Azattyq degen - bolashaq

Azattyq degen - bolashaq

Azattyq degen ne deseń,
Armany eldiń jaıdary.
Keńeıýi úshin keregeń
Keńesken baba oılary.

Shaıqas qyp maıdan alańyn
Uldaryń júrdi únemi.
Azattyq sol kez ananyń
Tilegen appaq tilegi.

Oıata berer ár tań bop,
Azattyq - ulttyń júregi.
Ol elge bir kez qalqan bop
Qorǵaǵan erdiń bilegi.

Azattyq desip shyrqar myń -
Estilip solaı tur úni.
Ol erler mingen tulpardyń
Tuıaǵynyń ystyq dúbiri.

Sanada jatqan san joly,
Ótkenniń joq qoı alysy.
Azattyq degen - ar joly,
Qara kóz qyzdyń namysy.

Azattyq jaıly sen de uqtyń,
Álemge ol dańqyn jaıady.
Keshegi ol ótken erliktiń
Búgingi núkte, baıany.

Ótkennen alǵan taǵylym
Azattyq degen - búginiń.
Sábıge berer tálimiń,
Sábıge berer bilimiń.

Kóterer erteń jelkenin
Búgingi sábı, bala shaq.
Azattyq degen - erteńiń,
Azattyq degen - bolashaq.

Azattyq qymbat - sony uqtyń,
Ortaq ol jasqa, kárige.
Álemde árbir halyqtyń
Azattyq qymbat bárine.

Avtory:
Ǵabıden QOJAHMET,
Qyzylorda qalasy