Ázirbaıjan Respýblıkasy Kaspı teńizindegi oqý-jattyǵý kezinde toǵyz qazaqstandyq áskerı qyzmetshiniń qaza tabýyna baılanysty Qazaqstanǵa resmı kóńil aıtty, dep habarlaıdy infohub.kz saıty.
Kóńil aıtý jedelhatyn Ázirbaıjannyń Syrtqy ister mınıstrligi men Qorǵanys mınıstrligi joldady. Dıplomatıalyq vedomstvo bolǵan qaıǵyly oqıǵaǵa qatty kúızelgenin bildirip, qaza tapqandardyń otbasylaryna, sondaı-aq Qazaqstan halqy men úkimetine kóńil aıtty.
«Qudaı qaza tapqandardyń janyn jánnatta etsin, otbasylaryna osy aýyr kezeńde kúsh pen sabyr bersin. Áli de habar-osharsyz ketkenderdiń aman-esen tabylýyna úmittenemiz, al jaraqat alǵan áskerı qyzmetshige tezirek saýyǵyp ketýin tileımiz», — delingen Ázirbaıjan SİM habarlamasynda.
Qazaqstannyń Qorǵanys mınıstri Dáýren Qosanovqa bólek kóńil aıtý jedelhatyn ázirbaıjandyq áriptesi — general-polkovnık Zakır Gasanov joldady.
«Kaspı teńizindegi oqý-jattyǵý kezinde sýǵa ketken toǵyz áskerı qyzmetshiniń qaza tabýy, bir áskerı qyzmetshiniń jaraqat alýy jáne jeti adamnyń habar-osharsyz ketýi týraly habardy estip qatty kúızeldim. Osy qaıǵyly oqıǵa saldarynan qaza tapqandardyń týǵan-týystaryna shyn júrekten kóńil aıtamyn, jaraqat alǵan áskerı qyzmetshige tezirek saýyǵyp ketýin tileımin. İzdestirý-qutqarý operasıalarynyń oń nátıjemen aıaqtalýyna úmittenemin. Qudaı qaza tapqandardyń janyn jánnatta etsin. Allah rahmet etsin!» — dep keltiredi kóńil aıtý mátinin Day.Az.
Eske salaıyq, tótenshe oqıǵa 24 qyrkúıekte Mańǵystaý oblysyndaǵy Kaspı teńizi jaǵalaýynda oqý-jaýyngerlik tapsyrmalardy oryndaý kezinde boldy: teńizge 19 áskerı qyzmetshini aǵyzyp áketti. Qazaqstan Qorǵanys mınıstrliginiń dereginshe, toǵyz adam qaza tapty, úsheýin qutqaryp qalý múmkin boldy, olardyń bireýi aýrýhanaǵa jatqyzyldy. Qalǵan jeti áskerı qyzmetshini izdeý jalǵasýda.
Áskerılerdiń qaza tabýyna qatysty qylmystyq is qozǵaldy. Bas prokýratýra bolǵan oqıǵanyń mán-jaıyn anyqtaıtyn jedel-tergeý tobyn qurdy.