Japonıada ótip jatqan Azıa oıyndarynda Qazaqstan quramasy ekinshi kún qatarynan komandalyq qorjynyn tek bes qola medalmen tolyqtyrdy. Al básekelester qarqynyn báseńdetpeı otyr: beıresmı medal esebinde qazaqstandyq sportshylardy Ózbekstan basyp ozdy, dep habarlaıdy infohub.kz saıty.
Senbide úsh ret qola júldege eskekshiler kóterildi — barlyǵy 500 metr qashyqtyqta. Qola júldeger atanǵandar: baıdarkashylar Stella Sýhanova men Dmıtrı Holmogorov, sondaı-aq kanoe-qospaqta óner kórsetken Sergeı Emelánov pen Rýfına Iskakova. Al baıdarka-qospaq ekıpajy Olga Shmeleva men Artem Tereshenko júldeden bir qadam qaldy.
Arına Malınovskaıa, Sofıa Shýljenko jáne Elızaveta Bezrýkovadan quralǵan áıelder komandasy 50 metrden úsh qalypta kishi kalıbrli vıntovkadan atýdan qola medal jeńip aldy.
Semsershiler Artem Sarkısán, Nurmuhammed Jaılybaı, Nazarbaı Sattarhan jáne Qýanysh Erǵashbaı sablısterdiń komandalyq týrnırinde úshinshi oryn aldy. Sarkısán úshin bul aǵymdaǵy jarystyń ekinshi qolasy.
Jeńil atletter qýantpady. Natýralızasıalanǵan kenıalyq Shadrak Koech marafonda 7-orynǵa turaqtady. Marıa Shývalova da 400 metrge júgirýde jetinshi bolyp márege jetti. Ivan Ivanov ıadro laqtyrýda toǵyzynshy, al Aıana Bolatbekqyzy 1500 metr qashyqtyqta onynshy oryn aldy.
Shtangashy Beksultan Aıtbaı 75 kelige deıingi salmaq dárejesinde jetinshi orynǵa turaqtady.
Boksshylar Mahmud Sabyrhan men Nurbek Oralbaı shırek fınalǵa shyqty. Vıktorıa Grafeeva tóreshilerdiń kómegimen bolsa da, genderlik tıesiligi daýly olımpıada chempıony Lın Iýıtınge jol berdi.
Áıelder gandbol quramasy Azıadadaǵy ónerin aıaqtaı otyryp, Ózbekstandy jeńdi. Al sý poloshylary, kerisinshe, Japonıada jańa ǵana bastady — A tobyndaǵy alǵashqy machta alań ıelerine ese jiberdi.
Azıadanyń jetinshi kúninen keıin beıresmı medal esebiniń kóshbasshylary (Qytaı, Japonıa, Ońtústik Koreıa) ózgergen joq. Altyn medal sany boıynsha Qazaqstandy Ózbekstan men Taıland qýyp jetti. Al kórshilerimiz kúmis qory boıynsha bizdiń atletterdi basyp ozdy. Qazaqstandyqtardan nebári bir altynǵa Iran men Bahreın qalyp qoıyp otyr. «Qola ǵasyryn» aıaqtaý ýaqyty keldi.
Japonıadaǵy XX Jazǵy Azıa oıyndary 19 qyrkúıekte resmı túrde ashyldy. 45 eldiń atletteri qatysatyn keshendi jarysta 460 medal jıyntyǵy sarapqa salynady: 217-si — erler arasynda, 204-i — áıelder arasynda jáne 39-y — aralas razrádtarda. Azıada-2026-da Qazaqstan quramasynyń quramynda 35 sport túrinen 558 sportshy óner kórsetedi.