Elordada Birikken Arab Ámirlikteriniń ınvestorlarynyń qatysýymen salynǵan SABIS International School halyqaralyq mektebi jumysyn bastady. Joba quny 30 mıllıon AQSh dollaryn qurady, dep habarlaıdy infohub.kz saıty.
SABIS International School – Astana oqý orny Qazaqstan prezıdentiniń BAÁ-ge sapary qorytyndysy boıynsha bergen tapsyrmasyna sáıkes salyndy. Jobany emırattyq Emirates Global Education Investment Group, Mazrui International jáne SABIS Holding kompanıalary bilim basqarmasy men KAZAKH INVEST ulttyq kompanıasynyń qoldaýymen júzege asyrdy.
Qurylysqa 30 mıllıon dollar salyndy, al jalpy ınvestısıa kólemi 45 mıllıonǵa jetýi tıis. Mektep 9 gektar aýmaqta ornalasyp, 3400 oqýshyǵa eseptelgen.
Oqý korpýsynan bólek, keshen quramyna teatr, jartylaı olımpıadalyq baseın, sport nysandary jáne jeke balabaqsha ǵımaraty kiredi. Qurylys jumystary 2024 jyldyń naýryz aıynda bastaldy.
Bul – eldegi SABIS bilim berý júıesi boıynsha jumys isteıtin alǵashqy oqý orny. Baǵdarlama ulttyq standarttarǵa beıimdelgen jáne oqýshylardy halyqaralyq emtıhandarǵa jáne álemniń jetekshi ýnıversıtetterine túsýge daıyndaıdy. Oqytý úsh tilde júrgiziledi: negizgi oqytý tili – aǵylshyn tili, sonymen qatar qazaq jáne orys tilderi oqytylady.
«Bizdiń maqsatymyz – Astanadaǵy otbasylarǵa Qazaqstannan shyqpaı-aq sapaly halyqaralyq bilim alý múmkindigin berý, SABIS-tiń 140 jylǵa jýyq tájirıbesin ulttyq bilim talaptarymen jáne Qazaqstannyń mádenı qundylyqtarymen ushtastyrý. Halyqaralyq deńgeıdegi bilim tek shetelde nemese shekteýli otbasylar tobyna ǵana qoljetimdi múmkindik retinde qabyldanbaýy kerek dep esepteımiz», – dedi SABIS prezıdenti jáne bas dırektory Vıktor Saad.
SABIS – 1886 jyly negizi qalanǵan halyqaralyq bilim berý jelisi, búginde bes qurlyqtaǵy 21 elde usynylǵan.
Mektepte oqý aqysy synypqa baılanysty 6,5 myńnan 8,6 myń dollarǵa deıin ózgeredi.
Buǵan deıin Astana halyqaralyq qarjy ortalyǵynyń soty Haileybury Almaty bedeldi mektebiniń talaby boıynsha sheshim shyǵarǵany habarlanǵan bolatyn. Oqý orny ata-analardan tólenbegen bilim qyzmetteri úshin 8,1 mıllıon teńgeni sátti óndirip aldy.