Baıqońyrda turaqty jumys orny men múlki joq er adam alıment tólemegeni úshin ákimshilik jaýapkershilikke tartyldy. Onyń kámeletke tolmaǵan balalary aldyndaǵy qaryz somasy 5 mıllıon teńgeden asty, dep habarlaıdy infohub.kz saıty.
Qyzylorda oblysy sottarynyń resmı Telegram-arnasynyń málimetinshe, Baıqońyr qalalyq sotynda azamatqa qatysty Qazaqstan Respýblıkasy Ákimshilik quqyq buzýshylyq týraly kodeksiniń 669-babynyń 1-bóligi boıynsha ákimshilik is qaraldy.
İs materıaldaryna sáıkes, sot buıryǵy negizinde er adam kámeletke tolmaǵan balalaryn asyraý úshin alıment tóleýge mindetti bolǵan. Alaıda, atqarýshylyq qujattyń talaptaryn bile tura, ol mindettemelerin oryndaýdan jaltarǵan.
Qazirgi ýaqytta qaryz somasy 5 029 720 teńgeni qurady. Quqyq buzýshynyń turaqty jumys orny, tabysy jáne onyń atyna tirkelgen múlki joq ekendigi anyqtaldy.
Sot otyrysynda ol turaqty jumysynyń bolmaýyna baılanysty mindettemelerin oryndaı almaǵanyn túsindirip, bolashaqta qaryzdy óteıtinine sendirdi.
Sot qaýlysymen er adam QR ÁQBtK-niń 669-babynyń 1-bóliginde kózdelgen ákimshilik quqyq buzýshylyqty jasaǵany úshin kináli dep tanylyp, oǵan 3 táýlik merzimge ákimshilik qamaqqa alý jazasy taǵaıyndaldy.