BAQAD aqyly jolymen júrý quny eki esege ósedi, alaıda bul barlyq avtokólik ıelerine emes, tek qyzmet aqysyn adal tólemeıtinderge áser etedi, dep habarlaıdy infohub.kz saıty.

Buǵan deıin 16 tamyzdan bastap Úlken Almaty aınalma avtomobıl jolymen (BAQAD) júrý eki ese qymbattaıtyny týraly aqparat taraǵan edi. Alaıda QR Kólik mınıstrligi jańa tarıfter barlyq qazaqstandyqtarǵa qatysty emes ekenin naqtylady.

«Negizgi ózgeris mynada: jol aqysyn ýaqytynda tóleıtin paıdalanýshylar úshin júrý quny is júzinde ózgermeıdi. Osylaısha, adal paıdalanýshylar úshin júrý quny burynǵy deńgeıde saqtalady jáne kólik quralynyń sanatyna qaraı 0,07 AEK-ten (302,75 teńge) 0,22 AEK-ke (951,5 teńge) deıin quraıdy. Jol aqysyn aldyn ala nemese jol júrý tirkelgennen keıin jeti jumys kúni ishinde tólegen kezde belgilengen tarıftiń 50 paıyzy mólsherinde jeńildik qoldanylady», – dep habarlady vedomstvodan.

Tarıftiń ósýi tek bazalyq stavkalarǵa áser etti, olar paıdalanýshy jol júrý tirkelgennen keıin jeti jumys kúni ishinde aqy tólemegen jaǵdaıda ǵana qoldanylady. Máselen, mundaı buzýshylyqtar kezinde qazaqstandyqtarǵa tóleýge týra keledi: jeńil avtokólikter úshin – 0,14 AEK (605,5 teńge); 16 orynǵa deıingi avtobýstar men júk kótergishtigi 2,5 tonnaǵa deıingi júk kólikteri úshin – 0,16 AEK (692 teńge); 32 orynǵa deıingi avtobýstar men 5,5 tonnaǵa deıingi júk kólikteri úshin – 0,28 AEK (1 211 teńge); 32 orynnan asatyn avtobýstar men júk kótergishtigi 10 tonnaǵa deıingi júk kólikteri úshin – 0,32 AEK (1 384 teńge); júk kótergishtigi 10-nan 15 tonnaǵa deıingi júk kólikteri úshin – 0,4 AEK (1 730 teńge); júk kótergishtigi 15 tonnadan asatyn júk kólikteri, onyń ishinde sedelnyı tartqyshtar úshin – 0,44 AEK (1 903 teńge).

«Basqasha aıtqanda, ózgerister tólem tártibin jaqsartýǵa baǵyttalǵan jáne ýaqytynda tóleıtin paıdalanýshylarǵa áser etpeıdi. Júrý qunyn esepteý prınsıpi burynǵydaı. Tólem mólsheri, burynǵydaı, kólik quralynyń sanatyna jáne aqyly ýchaskede bolǵan ýaqytqa (bir saǵat ishinde) baılanysty. Marshrýt uzaqtyǵy júrý qunyna áser etpeıdi», – dep qosty Kólik mınıstrliginde.

Sondaı-aq vedomstvo Almaty oblysynyń Talǵar, Qarasaı jáne İle aýdandarynyń turǵyndary úshin jeńildik sharttary ózgerissiz saqtalatynyn naqtylady. Bul sanattaǵy paıdalanýshylar úshin aılyq jáne jyldyq abonementterdiń quny burynǵy qalpynda qalady.