(Orystan)
-Jyrshy qus, tilimdi alyp, kelshi munda,
Jasyl shóp, jasyl aǵash qalsyn onda.
Qapasta janyń tynysh otyrasyń,
Jazy-qys jeıtin uryq bári qolda.
Men seni jan dosymdaı qadirleımin,
Erinbeı, tamaǵyńdy ázirleımin.
Móp-móldir saf kúmisteı, táp-tátti sý
Kúnde erte, jalǵany joq: «Ázir!»- deımin.
As-sýyń kereginshe daıar qylam,
Kem-ketik jeriń bolsa, daıar turam.
Jaz jetse - qorqynyshsyz, qys ýaıymsyz,
Dalada myń qorqynysh, sýyq boran.
Ańshy da myltyǵymen ata almaıdy,
Qarshyǵa jaqyndaýǵa bata almaıdy.
Kún uzyn jyryń jyrlap otyrasyń,
Basqa jan mundaı raqat taba almaıdy.
-Joq, myrza, bul maqtaǵan qapasynda,
Kirmeıtin boran, sýyq lapasyńa
Bermeımin qalyń aǵash, ózen-sýdy,
Kelse de myń bir pále bul basyma!
Jaınaǵan túrli gúlmen keń dalamdy,
Qaı jaqqa ushsam-qonsam keń dalamdy,
Balaqaı, asý-sýyńmen syılanam dep,
Janymnan, óz erkimnen qur qalam-dy.
-Keń dala, qalyń aǵash, aqqan bulaq,
Súıkimdi maǵan-daǵy jasyl quraq.
Quseke, sony oılashy, sýyq bolsa,
Qylasyń úsimesteı qaıda turaq?
Ketemin onda ushyp jyly jaqqa,
Qysy-jaz qar jaýmaıtyn bizdiń baqqa.
Qar ketip, sizdiń jaqta jyly bolsa,
Qaıtadan ushyp kelem eski taqqa.
-Adassań jazataıym joldan shyǵyp,
Qur tońyp ólmeısiń be boran soǵyp?
-SHyraǵym, onyń úshin qorqa qoıma,
Jasaǵan jol kórseter qaıyrym qylyp.

---