2026 jyldyń sońyna deıin Qazaqstannyń taǵy tórt óńirinde múgedek balalarǵa úıde ońaltý qyzmeti qoljetimdi bolady, dep habarlaıdy infohub.kz saıty.
Eńbek jáne halyqty áleýmettik qorǵaý mınıstrliginiń Múgedektigi bar adamdardy áleýmettik qorǵaý máseleleri jónindegi Úılestirý keńesiniń otyrysynda «QH Múgedek balalardy úı jaǵdaıynda ońaltý» jobasynyń aralyq qorytyndysy shyǵaryldy.
Qazir baǵdarlama «Qazaqstan halqyna» qoǵamdyq qorynyń qoldaýymen Ulttyq áleýmettik qorǵaý salasyn damytý ǵylymı ortalyǵymen birlesip júzege asyrylýda. Ol Shymkent, Qyzylorda, Pavlodar oblystary men Abaı oblysynda qoldanysta.
Joba bastalǵaly beri 628 bala úı jaǵdaıynda keshendi ońaltýdan ótti. Olarǵa 405 ınovasıalyq tehnıkalyq ońaltý quraly berildi. Mınıstrliktiń dereginshe, 470 balada oń ózgerister baıqaldy – bul baǵdarlamaǵa qatysýshylardyń 75% jýyǵy. Turaqty jattyǵýlardyń arqasynda 130 bala basyn senimdi ustaýǵa, 76 bala óz betimen otyrýǵa, 78 bala tireýishpen turýǵa úırense, 34 bala alǵashqy qadamdaryn jasady.
Abaı oblysynyń turǵyny Nazym Rashıtqyzynyń uly baǵdarlamaǵa bir jarym jyldan beri qatysyp keledi. Onyń aıtýynsha, osy ýaqyt ishinde bala aıaǵynda senimdirek tura bastaǵan, oıynshyqtardy ózi alyp, bógde adamnyń kómeginsiz tamaq ishýge tyrysady. «Bizdiń otbasy úshin bul – úlken jetistik. Biz bul joba úshin shyn júrekten alǵys aıtamyz jáne onyń jalǵasyn taýyp, kóptegen balaǵa qoljetimdi bolatynyna úmittenemiz», — dedi ol.
Jobanyń erekshelikteriniń biri – otbasylardy sıfrlyq baqylaý kúndeligi arqyly turaqty qashyqtyqtan qoldaý. Ońaltýshylar balanyń jaǵdaıyn baqylap, úıdegi jattyǵýlardyń nátıjesin taldap, qajet bolǵan jaǵdaıda qalpyna keltirý baǵdarlamasyn túzetedi. Mundaı format shalǵaı eldi mekenderde turatyn balalarǵa sapaly kómek kórsetýge múmkindik berdi. Bolashaqta sıfrlyq platformany ata-analarǵa arnalǵan oqý materıaldarymen, logopedıalyq jattyǵýlarmen jáne jańa qoldaý servısterimen tolyqtyrý josparlanýda. Sonymen qatar, ata-analardyń tájirıbe almasyp, bir-birin qoldaýy úshin turaqty betpe-bet kezdesýler kózdelgen.
2026 jyldyń sońyna deıin úıde ońaltý Mańǵystaý, Batys Qazaqstan, Soltústik Qazaqstan oblystary men Ulytaý oblysynyń turǵyndaryna qoljetimdi bolady. Otyrysty qorytyndylaı kele, Eńbek jáne halyqty áleýmettik qorǵaý mınıstri Asqarbek Ertaev jobany odan ári damytý tek memlekettiń, jergilikti atqarýshy organdardyń jáne qoǵamdyq uıymdardyń birlesken jumysy arqyly ǵana múmkin ekenin atap ótti.