Indonezıanyń Balı aralynda avstralıalyq er adam men onyń eki balasynyń denesi tanymal týrısik aımaqtaǵy býngalosynan óli kúıde tabyldy. Quqyq qorǵaý organdary tergeý júrgizip jatyr, dep habarlaıdy infohub.kz saıty.
56 jastaǵy Demıen Djon Shoý men onyń eki balasy — alty jastaǵy ul men tórt jastaǵy qyz — jeksenbi kúni Kýtadaǵy úılerinen óli tabyldy. Polısıanyń málimdeýinshe, kórshiler otbasynyń jaǵdaıyn tekserýge barǵan. Oǵan er adamnyń áıeliniń qońyraýy sebep bolǵan: ol kúıeýimen telefon arqyly sóılesken kezde balalarynyń bireýiniń jylaǵanyn estip, alańdaı bastaǵan. Ol sol ýaqytta Balıde bolmaǵan.
Avstralıalyq buqaralyq aqparat quraldary polısıa bul isti kisi óltirýge ulasqan sýısıd retinde qarastyryp jatqanyn jazdy. Alaıda polısıa Brıtandyq habar taratý korporasıasyna ólimniń sebebi men mán-jaıy ázirge anyqtalmaǵanyn, qosymsha saraptamalar júrgiziletinin málimdedi.
Polısıanyń habarlaýynsha, er adamnyń áıeli kúıeýimen sóılesip turǵanda balasynyń jylaǵanyn estigen soń kórshisine qońyraý shalǵan. Keıin ol kúıeýimen qaıta baılanysa almaǵan. Áıeli buǵan deıingi kúnderi astana Djakartaǵa barǵan.
Kórshisi basqa jergilikti turǵyndarmen birge esik qaqqanyna eshkim jaýap bermegen soń úıge kúshpen kirgen. İshinen úsh adamnyń denesi tabyldy.
Polısıa Shoýdyń Batys Avstralıadaǵy Frımantl qalasynyń týmasy ekenin aıtty. Shtattyń premeri Rodjer Kýk bul habardy «óte aýyr jaǵdaı» dep sıpattady. «Bul — óte qaıǵyly jaǵdaı; kim bolsa da, bárine qaıǵyryp kóńil aıtamyz. Ne bolǵanyn tezirek anyqtaı alamyz dep úmittenemiz», — dedi ol.