Almaty oblysynda Balqash kólinde zańsyz 261 kg balyq aýlaǵan eki brakonerge úkim shyǵaryldy. Onyń bireýi emdelýge jiberildi, dep habarlaıdy infohub.kz.
Almaty oblystyq sotynyń baspasóz qyzmetiniń málimetinshe, Balqash kólinde polısıa jáne balyq ınspeksıasy qyzmetkerleri T. men P. S. azamattaryn ustady. Olar «Yamaha-40» motorly qaıyqtar men 500 metrlik sıntetıkalyq aýlardy paıdalanǵan.
«Olar zańsyz 261 kg balyq aýlaǵan. Memleketke 1,2 mln teńge kóleminde eleýli zalal keltirilgen. Jaza taǵaıyndaý kezinde sot jeńildetetin mán-jaılar retinde sottalýshy T.-nyń kinásin tolyq moıyndaýyn, shyn júrekten ókinýin, sondaı-aq memleketke keltirilgen zalaldyń basym bóligin (890 myń teńge) erikti túrde ótegenin eskerdi», — dep málimdedi sottan.
Nátıjesinde T. kináli dep tanylyp, oǵan 3 jylǵa bas bostandyǵyn shekteý jazasy taǵaıyndaldy. Ol 3 jylǵa balyq aýlaý quqyǵynan aıyryldy, sondaı-aq probasıalyq baqylaý belgilenip, ol májbúrli eńbekke (jylyna 100 saǵat) tartylýǵa mindetteldi.
İstiń ekinshi fıgýranty P. quqyq buzýshylyqty jasaý kezinde psıhıkalyq jaǵdaıyna baılanysty esi durys emes kúıde bolǵan, sondyqtan ol qylmystyq jaýapkershilikten bosatyldy. Sot oǵan turǵylyqty jeri boıynsha dárigerdiń ambýlatorıalyq baqylaýy men emin taǵaıyndady.