Qazaqstan Úkimeti Balqash qalasynda jeke ınvestısıalar esebinen 750 mlrd teńgege jańa mys balqytý zaýytyn salýdy maquldady. Memleket basshysynyń tapsyrmasyn oryndaý maqsatynda Premer-Mınıstr Oljas Bektenov tıisti qaýlyǵa qol qoıdy, dep habarlaıdy infohub.kz saıty.
Jobany «Qazaq Smelter» JSHS júzege asyrady. Qurylys 2027 jyly bastalyp, paıdalanýǵa berý 2030 jylǵa josparlanǵan. Zaýyt 1,2 myńǵa jýyq adamdy turaqty jumyspen qamtamasyz etedi. İske qosylǵan kezde qyzmetkerlerdiń 90%-y qazaqstandyq mamandar bolady, al bes jyl ishinde bul úles 95%-ǵa jetedi. Investor sonymen qatar Qaraǵandy oblysynyń oqý oryndarynda 50 stýdentti oqytýdy qarjylandyrýǵa mindettendi.
Kásiporynnyń iske qosylýy Qazaqstandaǵy mys óndirisin bir jarym esege arttyrýǵa múmkindik beredi — qazirgi kórsetkishterden jylyna 800 myń tonnadan astamǵa deıin. Zaýyttyń jyldyq jobalyq qýaty: katodty mys — 300 myń tonna, altyn — 10 tonna, kúmis — 300 tonna, kúkirt qyshqyly — 1,5 mln tonnadan astam. Joǵary qosylǵan quny bar daıyn ónimniń eksporty 460 myń tonnadan 760 myń tonnaǵa deıin ósedi.
Buǵan deıin «Kýrsıv» «Qazaqmys» kompanıasy Qytaımen yntymaqtastyqta Balqash mys balqytý zaýytyn jańǵyrtýdy josparlap otyrǵanyn jazǵan bolatyn.