Balqash turǵyny 1,5 mıllıon teńge tólep páter satyp alǵanymen, mámileni rásimdeı almaı, sotqa júgingen, biraq talaby qanaǵattandyrylmaǵan. Bul týraly infohub.kz saıty habarlaıdy.
Qaraǵandy oblysy sottarynyń resmı Telegram-arnasynda habarlanǵandaı, Balqash qalalyq soty páter satyp alý-satý mámilesin jaramdy dep taný týraly talap aryz boıynsha azamattyq isti qarady. Talapkerdiń aıtýynsha, ol jaýapkerge turǵyn úı satyp alý úshin 1,5 mln teńge aqsha bergen, bul qolhatpen rastalady. Sonymen qatar, satýshy oǵan kiltter men quqyq belgileıtin qujattardyń túpnusqalaryn tapsyrǵan.
Talapkerdiń sózinshe, mámileni notarıaldy túrde rásimdeý múmkin bolmaǵan, sebebi jaýapker Qazaqstannan tys jerde turady, onyń rezıdent emes JSN-i joq, al ony ókil arqyly rásimdeý múmkin emes. Osyǵan baılanysty ol QR Azamattyq kodeksiniń 154-babynyń 2-tarmaǵyna súıene otyryp, mámileni jaramdy dep tanýdy suraǵan.
Jaýapker talapty moıyndap, aqshany alǵanyn rastap, páterge menshik quqyǵynyń aýysýyna qarsy bolmaǵan. Alaıda, isti qaraý barysynda daýly páter jaýapkerdiń ájesine 1994 jylǵy 27 qańtardaǵy jekeshelendirý sharty negizinde tıesili bolǵany anyqtaldy. Ol 2009 jyly qaıtys bolǵannan keıin páter jaýapkerge ósıet boıynsha qalǵan, biraq aqshany alyp, qolhat jazǵan kezde (2025 jylǵy 10 qyrkúıek) ol muragerlik quqyǵyn rásimdemegen jáne menshik quqyǵyn tirkemegen.
Sot QR Azamattyq kodeksiniń 118-babynyń 1-tarmaǵyna sáıkes jyljymaıtyn múlikke quqyqtar memlekettik tirkeýge jatatynyn kórsetti. 188-baptyń 2 jáne 3-tarmaqtaryna sáıkes, tek menshik ıesi ǵana múlikti ıelenýge, paıdalanýǵa jáne oǵan bılik etýge, onyń ishinde ony ıelikten shyǵarýǵa quqyly. Jaýapker mámile jasalǵan kezde menshik ıesi bolmaǵandyqtan, onyń páterge bılik etýge zańdy negizi bolmaǵan.
Talapkerdiń jaýapkerdiń muragerlikti rásimdeý jáne JSN alý úshin Qazaqstanǵa kele almaıtyndyǵy týraly dálelderin sot qabyldamady, bul jaǵdaılar muragerlikti rásimdeý jáne jyljymaıtyn múlikke quqyqtardy tirkeý tártibin saqtaýdan bosatpaıtynyn atap ótti.
Nátıjesinde Balqash qalalyq soty talapty qanaǵattandyrýdan bas tartty. Azamattyq ister jónindegi sot alqasy sheshimdi ózgerissiz, al apelásıalyq shaǵymdy qanaǵattandyrýsyz qaldyrdy.