Balqashta qalanyń basty kásibı merekeleriniń biri – metalýrgter kúni atap ótildi. Salada alty myńnan astam turǵyn jumys isteıdi, kóbi otbasylyq eńbek áýletterin jalǵastyrýda. Saltanatty shara barysynda úzdik qyzmetkerlerge memlekettik jáne vedimistik nagradalar tabystalyp, óńir basshylyǵy men «Qazaqmys» korporasıasy jańa óndiristik jáne áleýmettik jobalar týraly aıtty, dep habarlaıdy infohub.kz.
Tek 2026 jyldyń birinshi jartyjyldyǵynda ǵana Balqash mys balqytý zaýyty 96 myń tonnadan astam katodty mys óndirdi.
Sala qyzmetkerlerin kásibı merekemen quttyqtaýǵa Qaraǵandy oblysynyń ákimi Ermaǵanbet Bólekpaev keldi. Ol metalýrgterdiń eńbegi óńir ekonomıkasynyń negizgi tirekteriniń biri bolyp qala beretinin atap ótti.
«Qazaqstan Prezıdenti Qasym-Jomart Toqaev eńbek adamy qoǵamda erekshe qurmetke ıe bolýy kerek ekenin birneshe ret aıtqan. Bul sózder metalýrgterge tolyǵymen qatysty. Sizderdiń kásibı sheberlikterińizdiń arqasynda Qaraǵandy oblysy eldiń ónerkásibinde kóshbasshy pozısıalardy saqtap otyr», — dedi Bólekpaev.
Onyń aıtýynsha, 2025 jyly oblystyń ónerkásiptik óndiris kólemi 5,3 trln teńgeden asty, onyń shamamen 3,8 trln teńgesi óńdeý ónerkásibine tıesili boldy.
Óńir basshysy eńbek áýletteriniń salany damytýǵa qosqan úlesin atap, mysal retinde jalpy eńbek ótili júz jyldan asqan Aqbergenovter otbasyn keltirdi.
Shara barysynda úzdik qyzmetkerler «Eńbek Dańqy», «Qurmetti metalýrg» tósbelgilerimen jáne «Eńbek ardageri» medalimen marapattaldy.
«Qazaqmys Korporasıasy» JSHS basqarma tóraǵasy Rýslan Óskenáli Balqash óndiristik alańynyń damýy týraly aıtty. Onyń aıtýynsha, kompanıanyń basty basymdyǵy – qyzmetkerlerdiń qaýipsizdigi men óndiristi jańǵyrtý.
«Birinshi jartyjyldyqta Balqash mys balqytý zaýyty 96 myń tonnadan astam katodty mys shyǵardy. Bul sannyń artynda myńdaǵan qyzmetkerdiń kúndelikti eńbegi tur. Búgin biz óndiristik ınfraqurylymdy jańartyp, jabdyqtardy modernızasıalap, eńbek jaǵdaılaryn jaqsartyp, áleýmettik baǵdarlamalardy damytýdamyz», — dep atap ótti ol.
Qazirgi ýaqytta kásiporynda PV-1 jáne PV-2 balqytý agregattaryna kúrdeli jóndeý júrgizilip, óndiristik ǵımarattardyń shatyrlary men nóserli káriz júıesi jańartylyp, zamanaýı kondısıonerleý júıeleri ornatylýda.
Jyl sońyna deıin Balqash óndiristik alańy jalpy quny 166 mln teńgeden astam eki jańa jedel járdem kóligin alady. Sonymen qatar, «Gıgıena» korporatıvtik baǵdarlamasy boıynsha 2026 jyly 24 áleýmettik-turmystyq nysandy modernızasıalaý josparlanǵan. Osy maqsattarǵa kompanıa 754 mln teńge bóledi.
«Qazamys Korporasıasy» JSHS baıqaý keńesiniń tóraǵasy Nurmuhambet Ábdibekov kompanıanyń áleýmettik jobalary týraly aıtty.
Onyń aıtýynsha, kompanıa tek óndiriske ǵana emes, kásiporyndar jumys isteıtin qalalardyń damýyna da ınvestısıa salady.
«“Qazaqmys” áleýmettik jáne ınfraqurylymdyq jobalarynyń jalpy portfeli shamamen 45 mlrd teńgeni quraıdy. Balqashta jaqyn jyldary zamanaýı balabaqsha men sporttyq-týrıstik baza salý josparlanýda. Bul qalanyń damýyna ǵana emes, bizdiń qyzmetkerlerimiz ben olardyń otbasylarynyń ómir sapasyna qosqan úles», — dep atap ótti Nurmuhambet Ábdibekov.
Balqashtaǵy merekelik sharalar festıvál, sporttyq jarystar, konserttik baǵdarlama jáne salútpen jalǵasady.