Eki táýlikke jýyq toqtaýsyz jaýǵan nóser Bangkok kóshelerin sý alabyna aınaldyrdy: joldar, dúkender men turǵyn úıler sý astynda qaldy, keı jerlerde sý belden asty, áleýmettik jelilerde sý basqan kvartaldardyń kadrlary tarady, dep habarlaıdy infohub.kz saıty.
24–26 qyrkúıek aralyǵynda Taıland astanasynyń keıbir aýdandarynda 300 mm-den astam jaýyn-shashyn tústi. Birneshe kúnnen keıin sý qalalyq kanaldardy toltyryp, drenaj júıesi mundaı kólemge tótep bere almady. Nátıjesinde bılik qalanyń barlyq 50 aýdanynda tótenshe jaǵdaı rejımin jarıalady.
Kóshelerden túsirilgen foto men vıdeolarda sý astynda qalǵan kólikter men sý basqan joldarmen júrýge tyrysqan motosıklshiler kórinedi. Keıbir jerlerde sý adamdardyń keýdesine nemese beline jetti. Bıliktiń dereginshe, shamamen 52 myń úı sharýashylyǵy zardap shegip, birneshe myń adam ýaqytsha baspanalarǵa kóshirildi.
Sonymen qatar áleýmettik jelilerde sý basqan kóshelerde qalǵan jergilikti janýarlar týraly birneshe beınerolık paıda boldy. Paıdalanýshylar sý kanaldardan shyqqan aýdandarda jylandar men balyqtardyń paıda bolýyn talqylaýda.
Bir qyzyǵy, qyrkúıektegi sý tasqyny Bangkok úshin óz aldyna jańalyq emes. Kúz — jańbyrly maýsymnyń sharyqtaý shegi, al qala bul mezgilde únemi sý basýǵa tap bolady. Alaıda bıylǵy jaýyn-shashyn kólemi ádettegiden áldeqaıda joǵary boldy. Sarapshylardyń dereginshe, 1–25 qyrkúıek aralyǵynda Bangkokqa 487 mm jańbyr jaýǵan, al 1991–2020 jyldardaǵy osy kezeńdegi ortasha kórsetkish 269 mm bolǵan.
Buǵan deıin Kursiv LifeStyle jazda Astanaǵa burshaqpen qosa qatty nóser jaýǵanyn habarlaǵan. Birneshe mınýttyń ishinde astananyń birneshe aýdanyndaǵy joldardy sý basyp, kólikter júrginshi jolynda «júzip» ketken.