Taıland astanasy Bangkokta 48 saǵatqa sozylǵan nóserden keıin kóshelerdi sý basyp, tótenshe jaǵdaı jarıalandy. Turǵyndarǵa úıde qalýǵa keńes berilip, qalanyń kanaldar júıesine jaqyn jerde turatyndarǵa zattaryn joǵarǵy qabatqa kóshirý usynyldy, dep habarlaıdy infohub.kz saıty.
Taılandta jyldyń osy mezgilinde naızaǵaıly jaýyn-shashyn jıi bolady. Alaıda sońǵy kúnderdegi tótenshe aýa raıy Bangkoktyń sý burý júıesin ábden tıtyqtatyp, keptelisimen áıgili joldarda kólik qozǵalysyn buzdy. Jaýyn senbige deıin jalǵasady dep kútilýde, bul taǵy da birneshe kanaldyń jaǵasynan asyp ketý qaýpin týdyryp otyr.
Ortalyq Bangkoktan soltústikke qaraı kanal jaǵasynda turatyn 67 jastaǵy Somkıd Pheýk-ngam Frans-Press agenttigine bylaı dedi: «Sý úzdiksiz kelip jatyr. Qazir syrtqa shyǵý qıyn. Belimniń deńgeıine jetti. Eshqaıda bara almaımyn. Dúkenimdi eki kúnnen beri jaýyp qoıdym».
Onyń aıtýynsha, qaladaǵy sý deńgeıi 2011 jylǵy jaǵdaıdan da nashar kórinedi. Sol jyly Bangkokty búkil eldi qamtyǵan úsh aıǵa sozylǵan tótenshe aýa raıy oqıǵasy ábden álsiretken edi. Taılandta sol kezde júzdegen adam qaza tapqan. Alaıda qazirgi tasqynnan Bangkokta ázirge qaza bolǵandar tirkelgen joq.
Taıland meteorologıalyq qyzmeti apta boıy taǵy da qatty jaýyn jaýatynyn boljap otyr. Sońǵy kúnderdegi nóserdi týdyrǵan tómen qysym aımaǵy Taılandtyń ortalyǵyna qaraı jyljıdy dep kútilýde.
Bangkoktyń barlyq 50 aýdany tótenshe aımaq dep jarıalandy.
Frans-Press agenttiginiń habarlaýynsha, qala ákimi Chadchart Sıttıpýnt qalanyń shyǵys bóligi eń qatty zardap shekkenin aıtty.
«Jaýyn toqtamaı tur, biz qoldan kelgenniń bárin jasap jatyrmyz. Sýdy sorǵyzyp shyǵarýǵa tyrysyp jatyrmyz, biraq kanaldardaǵy sý lyq toly... Qaýipti aımaqtar — kanal jaǵasynda turatyndar. Qazir barlyq kanal toly», — dedi ol.