Bank SentrKredıt 2026 jylǵy 30 maýsymnan keıin úsh enshiles qurylymynyń kapıtalyn 26,9 mlrd teńgege ulǵaıtty. Qarajat BCC-HUB, BCC Invest jáne BCC Project kompanıalaryna tústi. Bul týraly kredıttik uıymnyń aralyq qarjylyq eseptiliginen belgili boldy, dep habarlaıdy infohub.kz saıty.
Eń úlken salym BCC Project kompanıasyna baǵyttaldy: 2026 jylǵy qyrkúıekte onyń jarǵylyq kapıtaly 18,087 mlrd teńgege ósti. Aıta keteıik, bul úles aqshalaı emes, kompanıaǵa jyljymaıtyn múlikti berý arqyly qosyldy. BCC Project tolyǵymen BSK-ǵa tıesili jáne problemalyq aktıvterdi basqarýmen aınalysady.
Taǵy 4,995 mlrd teńgeni bank tamyz aıynda BCC Invest kompanıasyna jiberdi. Kapıtaldy ulǵaıtý úshin BSK enshiles kompanıanyń shamamen 1,1 mlrd jaı aksıasyn bir qaǵazy 4,56 teńgeden satyp aldy. BCC Invest brokerlik-dılerlik qyzmetpen aınalysady.
Shilde jáne tamyz aılarynda BCC-HUB kompanıasynyń jarǵylyq kapıtaly aqshalaı qarajat esebinen taǵy 3,846 mlrd teńgege ulǵaıtyldy. Kompanıa da tolyǵymen bankke tıesili jáne IT-qyzmetter kórsetedi.
Bólek, shilde jáne tamyz aılarynda bank jańa enshiles kompanıasy BCC ODEPT-tiń jarǵylyq kapıtalyn 350 mln teńge mólsherinde qurdy. Kompanıa sıfrlyq B2B-platformany damytady. Osy qarajatty eskergende, tórt enshiles qurylymnyń kapıtalyn ulǵaıtý shamamen 27,3 mlrd teńgeni qurady.
Bank SentrKredıt Qazaqstanda 1988 jyldan beri jumys isteıdi jáne júıelik mańyzy bar bankter qataryna jatady. 2026 jylǵy 30 maýsymdaǵy jaǵdaı boıynsha onyń 21 fılıaly boldy. Banktiń aktıvteri shamamen 9 trln teńge, mindettemeleri 8 trln teńge. 2026 jylǵy qańtar-shilde aılaryndaǵy taza paıdasy 123 trln teńgeni quraıdy. Eseptilikke sáıkes, BSK-nyń jaı aksıalarynyń eń iri ıesi — Baqytbek Baıseıtov, onyń úlesi 52,12%, taǵy 12% Vladıslav Lıge tıesili. Qalǵan aksıonerlerdiń árqaısysy 5%-dan az jaı aksıaǵa ıe, olar birlesip 35,88% baqylaıdy.