2026 jyldyń birinshi jartyjyldyǵynyń qorytyndysy boıynsha Bank RBK 27 mlrd teńge paıda tapty. Bul ótken jyldyń sáıkes kezeńimen salystyrǵanda 21%-ǵa, ıaǵnı 7,2 mlrd teńgege az. Paıdanyń azaıýyna negizinen paıyzdyq emes kiristerdiń qysqarýy áser etti, dep habarlaıdy infohub.kz saıty.
Banktiń paıyzdyq túsimi 12%-ǵa ósip, 169 mlrd teńgege jetti. Atap aıtqanda, klıentterge berilgen kredıtter boıynsha paıyzdyq kiris 139 mlrd teńgeni qurady. Paıyzdyq shyǵystar 114 mlrd teńge bolǵanda, taza paıyzdyq kiris 54,7 mlrd teńge bolyp, azdap qana — 290 mln teńgege ósti.
Banktiń komısıalyq kiristeri 2,8 mlrd teńgege tómendep, 7,4 mlrd teńgege jetti. Shetel valútasymen jasalǵan operasıalardan túsken paıda 1,7 mlrd teńgege azaıyp, 18 mlrd teńge boldy. Al týyndy qarjy quraldarymen — valútalyq svoptar men forvardtyq valútalyq kelisimdermen — jasalǵan operasıalar kompanıaǵa 10,9 mlrd teńge shyǵyn ákeldi, bir jyl buryn bul operasıalardan 4 mlrd teńge paıda bolǵan edi.
Sonymen qatar banktiń qarjylyq mindettemelerdi alǵashqy taný kezindegi paıdasy aıtarlyqtaı — 5,64 esege — azaıyp, 1,78 mlrd teńge boldy (bir jyl buryn 10 mlrd teńge edi). Banktiń basqa da operasıalyq kiristeri eki ese ósip, 3,7 mlrd teńgege jetti. Nátıjesinde banktiń paıyzdyq emes kiristeri 2,5 esege quldyrap, 16 mlrd teńge boldy. Al paıyzdyq emes shyǵystar 24 mlrd teńgeni qurady.
Birinshi jartyjyldyqta Bank RBK 3,5 mlrd teńge tabys salyǵyn tóledi — 2025 jyldyń birinshi jartyjyldyǵymen salystyrǵanda 24%-ǵa az. Bul rette salyq tóleýge deıingi paıda 21%-ǵa tómendedi.
Bank RBK aktıvteri 4%-ǵa ósip, 2,8 trln teńgege jetti. Mindettemeleri 4,7%-ǵa artyp, 2,6 trln teńge boldy.
Aıta keteıik, KASE derekteri boıynsha Bank RBK aksıalarynyń 84,81%-y «KSS Fınans» kompanıasyna tıesili. Ol arqyly bankti Qazaqstandaǵy eń baı adamdar tiziminde ekinshi orynda turǵan, baılyǵy $5,9 mlrd bolatyn kásipker Vladımır Kım baqylaıdy.
Eske salaıyq, maýsymda Bank RBK aktıvteri boıynsha elde 7-orynǵa kóterildi, buǵan deıin 10-orynda bolatyn.