Qazaqstanda nesıe berý erejeleri kúsheıtildi: endi bankter qaryz alýshylardyń qarjylyq jaǵdaıyn muqıat tekseretin bolady, dep habarlaıdy infohub.kz saıty.
Ulttyq bank nesıe berýdi retteıtin qaýlyǵa ózgerister engizdi. Endi nesıe qabilettiligin baǵalaý kezinde bankter klıenttiń sońǵy alty aıdaǵy qarjylyq tarıhyn eskeredi, al menshikti shottar arasyndaǵy aýdarymdar arqyly tabysty jasandy túrde kóterý endi ótpeıdi.
Esepteý kezinde jalaqy, zeınetaqy, stıpendıa jáne áleýmettik tólemder eskeriledi. Aqshalaı túsimder keminde eki túrli aıda tirkelýi tıis, sodan keıin bank ortasha aılyq tabysty anyqtaıdy. Sondaı-aq qaryz alýshynyń mindettemelerin baqylaý kúsheıtildi: esepteýge nesıeler, mıkronesıeler, merzimi ótken tólemder jáne keıbir esepten shyǵarylǵan qaryzdar alynady. Eger tólemder mólsheri tabysqa qatysty tym úlken bolsa, jańa nesıe berýden bas tartylýy múmkin. Sonymen qatar, bankter qaryzdyń tabysqa qatynasy koefısıentin (QTQ) qoldanatyn bolady.
Ulttyq banktiń aqparat jáne komýnıkasıalar departamentiniń dırektory – baspasóz hatshysy Asan Ahmetjannyń túsindirýinshe, QTQ qaryz alýshynyń jyldyq tabysyna qatysty qaryz somasyn kórsetedi. Bul kórsetkishtiń joǵary máni joǵary qaryz júktemesin jáne tólem qabiletsizdigi yqtımaldyǵynyń artýyn kórsetedi. Bastama bankterdiń jaýapty nesıe saıasatyn yntalandyrýǵa, halyqtyń shamadan tys nesıelený qaýpin azaıtýǵa, qarjy júıesiniń turaqtylyǵyn nyǵaıtýǵa jáne nesıeleý qurylymyn teńgerimdi qalyptastyrýǵa baǵyttalǵan.
Ázirge QTQ monıtorıńtik sıpatqa ıe – azamattar úshin qatań shekteýler belgilenbegen. Degenmen, 21 jasqa tolmaǵan qaryz alýshylar, ataýly áleýmettik kómek alýshylar jáne qumar oıynǵa táýeldilik belgileri bar klıentter jeke tekseriletin bolady. Sonymen qatar, QTQ shekteýleri nesıelerdiń barlyq túrlerine qoldanylmaıdy: bilim berý nesıeleri, jekelegen ıpotekalyq jáne avtokólik nesıeleri erekshelik bolyp tabylady.