Kasasıalyq sot kazakstandyq áıeldiń bankrot dep taný týraly ótinishin qanaǵattandyrdy. Buǵan deıin oǵan JSHS jarǵylyq kapıtalyndaǵy úlesine baılanysty bas tartylǵan edi, dep habarlaıdy infohub.kz saıty.
Baspasóz qyzmetiniń málimetinshe, Azamattyq ister jónindegi kasasıalyq sot azamatsha H-tyń sot bankrottyǵy rásimin qoldaný týraly ótinishin qarady. İİ toptaǵy múgedek, onkologıalyq aýrýmen aýyratyn áıel ózin bankrot dep tanýdy suraǵan. Onyń qaryzy 4,5 mln teńgeni quraǵan. Alaıda birinshi jáne apelásıalyq satydaǵy sottar oǵan bas tartqan, sebebi ol JSHS jarǵylyq kapıtalyndaǵy 25,9% úleske ıe.
Alaıda kasasıalyq sot bul tujyrymdarmen kelispedi. Sotta atap ótilgendeı: «JSHS eki jyldan astam ýaqyt boıy is júzinde qyzmet atqarmaıdy, onyń múlki nebári 103 myń teńgege baǵalanǵan, al ótinish berýshiniń úlesiniń quny nebári 26 677 teńgeni quraıdy, bul qaryzdy óteýge jetkiliksiz. Sonymen qatar, ótinish berýshi JSHS-ǵa qatysýynan eshqandaı tabys almaıdy, onyń jalǵyz tabys kózi — múgedektik boıynsha járdemaqy».
Sot zańdy tulǵadaǵy úlestiń bolýy ózdiginen sot bankrottyǵy rásimin qoldanýdan bas tartýǵa negiz bola almaıtynyn atap ótti. Mundaı isterdi qaraý kezinde múliktiń naqty qunyn jáne boryshkerdiń naqty tólem qabilettiligin eskerý qajet.
Nátıjesinde sot tómengi satydaǵy sot aktilerin joıyp, azamatsha H-qa qatysty sot bankrottyǵy rásimin qoldandy.