InfoHub Logo

Kólshik mańyndaǵy kógalda baqa men kirpi bir-biriniń túrin kórip, qaıran qalysypty. Kózi badyraıyp, júregi lúpildegen baqa:

         — Tula boıyń túgel tikenek, ne degen turpaıysyń! – depti kirpige, baqaǵa batpaı buıyǵyp turǵan kirpi:

         — Ózgelerdiń kózinshe tula boıyn tyrtıtyp seniń túriń de kelisip tur eken! Túrińdi kórgende, denemniń túrshikkenin-shi! – dep, tikenekterin tikireıtip, tumsyǵyn tyjyraıtyp, kúlip jiberipti.

         Eki aıaǵymen jer tirep, eńsesin kóterip, kólbaqa ishteı seskense de esesin jibergisi kelmeı:

         — Osy kókmaısaǵa bir aýnamaı, ómir boıy tikenek arqalaǵan tirshiligiń qurysyn! – depti kómeıi búlkildep.

         — But-borbaıyńdy shópke jyrǵyzyp, jalańash júrgen seniń tirshiligiń qurysyn! – depti, kirpi tikenek arqasyn shegirge úıkep-úıkep qoıyp.

         Baqa sol tikenek ózine qadalǵandaı qaımyǵyp, bylaı dep baqyldaı jónelipti:

         Jan saıa dep bilgenim,

         Jalǵyz ǵana kól meniń.

         Jap-jalańash júrgenim,

         Jaı-mánisi sol meniń.

         Jalynaıyn men kimge,

         Jan qysylsa árdaıym.

         Sýǵa dereý súńgýge

         Jalańashpyn dap-daıyn...

Baqa jaıyn túsingen kirpi de qyrtysy jazylyp, til qatypty:

       Bar shynyńdy búkpegen,

       Bireý kórse búktelem,

       Óli-tirim sezilmeı.

       Domalanǵan tikenge

       Kózi barlar jolaı ma!

       Kóne qoımas ıkemge

       Men bir jatqan shońaına!

       Jylandy da jabysyp,

       Jyljytpaýdyń ebi - osy.

       Qamshylasa alysyp,

       Qan bolady denesi!

         Kirpi sony aıtyp, jylan ustaǵandaı jıyryla qoıypty, baqa shop etip sýǵa súńgip ketipti.

---