Aqmola oblystyq soty Qýandyq Bıshimbaevtyń nemere aǵasy Baqytjan Baıjanovtyń merziminen buryn bosatylý sebepterin túsindirdi, dep habarlaıdy infohub.kz saıty.
Sot baspasóz qyzmetiniń málimetinshe, Baıjanovqa qatysty jazanyń ótelmegen bóligin qysqartý týraly usynysty QR İİM Qylmystyq-atqarý júıesi komıtetiniń №4 mekemesiniń bastyǵy jibergen. Sottalýshy men onyń qorǵaýshylary bul ótinishti qanaǵattandyrýdy suraǵan, prokýror da qoldaǵan.
Zań boıynsha, aýyr nemese asa aýyr qylmys jasaǵan, teris minez-qulyq sıpaty joq jáne amnıstıa qoldanylǵan kezde ótelmegen jaza merzimi bir jyldan aspaıtyn adamdarǵa negizgi jazanyń ótelmegen bóligi qysqartylady. Baıjanov aýyr qylmys jasaǵan, biraq teris sıpattamasy bolmaǵan, al ótelmegen merzimi nebári 3 aı 18 kúndi quraǵan.
Sot otyrysynda sottalýshy amnıstıany qoldanýǵa qarsy bolmady. Sot usynysty qanaǵattandyryp, ótelmegen merzimdi tolyq qysqartty. Baıjanov bas bostandyǵynan aıyrý oryndarynan bosatyldy, alaıda qaýly áli zańdy kúshine engen joq.
Buǵan deıin advokat Ǵazız Yntyqbaev Baıjanovtyń bostandyqqa shyǵyp, otbasyna oralatynyn habarlaǵan edi. Qylmystyq-atqarý júıesi komıteti bul aqparatty rastap, oǵan qatysty 6 jyl merzimge probasıalyq baqylaý jáne ákimshilik qadaǵalaý belgilengenin aıtty.