«Barys» hokeı klýby Kontınentaldi hokeı lıgasynyń (KHL) jańa maýsymynda komandany basqaratyn bapkerlik shtabty resmı túrde tanystyrdy, dep habarlaıdy infohub.kz.
Bas bapker bolyp reseılik maman Mıhaıl Kraves qalady, ol ekinshi maýsymyn ótkizedi. Onyń kómekshisi retinde qazaqstandyq bapker Talǵat Jaılaýov jumysyn jalǵastyrady. Jaılaýovtyń jetekshiligimen Qazaqstan ulttyq quramasy kóktemde Polshada ótken birinshi dıvızıon týrnırinde álem chempıonatynyń elıtalyq dıvızıonyna joldamany merziminen buryn jeńip alǵan bolatyn. Shabýylshylarmen jumys isteýge Aleksandr Savchenkov, qorǵaýshylardy Evgenı Korolev, qaqpashylardy Konstantın Barýlın jattyqtyrady. Jalpy dene daıyndyǵy bapkerleri bolyp Denıs Mıhaılıchenko men Igor Elıseev, vıdeo-bapkerler bolyp Sergeı Tambýlov pen Vladıslav Belan taǵaıyndaldy.
Eske sala keteıik, 17 shildeden bastap «Barys-Arena» muz aıdynynda eki jaqty kelisimsharttary bar oıynshylarǵa arnalǵan jattyǵýlar bastaldy. Olar KHL-da «Barys» úshin de, Qazaqstan chempıonatynda onyń farm-klýby «Nomad» úshin de óner kórsete alady. Tamyz aıynyń basynda olarǵa negizgi quramnyń oıynshylary qosylady.
«Barys» alǵashqy maýsym aldyndaǵy machyn 17 tamyzda Ýfa qalasynda ótetin Bashqurtstan Respýblıkasy Kýbogynda ótkizedi, onda qarsylastary jergilikti «Salavat Iýlaev», habarovtyq «Amýr» jáne toláttılik «Lada» bolady. 20 shildede týrnırdiń tolyq kestesi belgili boldy. Birinshi týrda (bir aınalymda ótedi) «Barys» ıelerimen 17 tamyzda Astana ýaqytymen saǵat 19:00-de kezdesedi. 18 tamyzda saǵat 15:00-de «Amýrmen», 20 tamyzda saǵat 13:00-de «Ladamen» oınaıdy. Bashqurtstan Respýblıkasy Kýbogy 1999 jyldan beri oınatylyp keledi, ony eń kóp «Salavat Iýlaev» jeńip alǵan (12 ret), úsh ret ıaroslavldik «Lokomotıv» jeńiske jetken. «Barys» úshin bul ekinshi qatysý: 2018 jyly komanda sońǵy, tórtinshi oryn aldy.
27 tamyzda astanalyq klýb Sankt-Peterbýrgte SKA jáne KSRO quramasynyń qaqpashysy Nıkolaı Pýchkovty eske alý týrnırinde ekinshi maýsym aldyndaǵy týrnırdi bastaıdy. «Barystyń» bul týrnırdegi qarsylastary (bir aınalym) SKA, onyń farm-klýby SKA-VMF jáne habarovtyq «Amýr» bolady. Jeńimpaz eń kóp upaı sany boıynsha anyqtalady.