Astanalyq «Barys» hokeı klýby Kontınentaldik hokeı lıgasynyń turaqty chempıonatynda tómengi Kamanyń «Neftehımıgine» qarsy machyn keıinge shegergenin habarlady. Sebebi — elde jarıalanǵan ulttyq aza tutý, dep jazady infohub.kz saıty.
Tıisti sheshimdi «Barys» baspasóz qyzmeti klýbtyń Instagram-daǵy resmı paraqshasynda jarıalady. Oıyn búgin, 25 qyrkúıekte ótýi tıis edi, alaıda komanda basshylyǵy aza tutýǵa baılanysty ony ótkizbeýge sheshim qabyldady.
Aıtýlarynsha, machty toqtatý týraly sheshim barlyq múddeli taraptarmen kelisilgen. Kezdesýdiń jańa merzimi — 26 qyrkúıek.
«Kezdesý Qazaqstan ýaqytymen 13:00-de bastalady. 25 qyrkúıekke satyp alynǵan bıletterdiń barlyǵy erteńgi machqa jaramdy», — dep eskertti klýbta.
Sonymen qatar jastar komandasynyń machy da keıinge shegerildi: «Qar barystary» «Sibir snaıperlerimen» oınaýy tıis edi. Bul kezdesý de 26 qyrkúıekte, biraq 17:00-de ótedi. Satyp alynǵan bıletter kúshinde qalady.
Eske salaıyq, 24 qyrkúıekte oqý-jaýyngerlik tapsyrmany oryndaý barysynda aýa raıynyń kenetten kúrt nasharlaýy men ekpindi jelden Kaspı teńizine 17 áskerı qyzmetshi aǵyzylyp ketken bolatyn. Úsheýi qutqarylyp, bireýi aýrýhanaǵa jatqyzyldy. 12 adamnyń qaza tapqany habarlandy, eki joǵalǵan adam izdestirildi. Búgin olardyń deneleri tabyldy, osylaısha tragedıa qurbandarynyń jalpy sany 14 adamǵa jetti.