Atyraý oblysynyń búdjetten 88,8 mln teńgeden astam qarajat jymqyrǵan býhgalteri túrmede jeti jyl otyrady — Bas prokýratýra zańsyz amnıstıanyń kúshin joıdy, dep habarlaıdy infohub.kz.
Qylmys 2023–2024 jyldary jasalǵan. Tergeý dereginshe, býhgalter memlekettik mekeme basshysymen birigip, búdjetten ondaǵan mıllıon teńgeni ıelengen.
Alǵashynda sot áıeldi jeti jylǵa bas bostandyǵynan aıyrýǵa sottady. Alaıda keıin amnıstıa qoldanylyp, jaza merzimi tórt jyl segiz aıǵa qysqartyldy.
Tekserý barysynda Bas prokýratýra bul sheshimniń zań buzýshylyqpen qabyldanǵanyn anyqtady. Qoldanystaǵy zańnama boıynsha, erekshe iri mólsherde jymqyrǵany úshin sottalǵandar amnıstıaǵa keltirilgen zalaldy tolyq ótegen jaǵdaıda ǵana sene alady.
Bul jaǵdaıda shart oryndalmaǵan. Sottalǵan áıel urlanǵan somanyń barlyǵyn qaıtarmaǵan, onyń ústine sot odan taǵy 36,8 mln teńgeden astam ótelmegen zalaldy óndirýdi sheshken.
Osyǵan qaramastan, birinshi satydaǵy sot jaza merzimin úshten birge qysqartty, al apelásıalyq saty sheshimdi ózgerissiz qaldyrdy.
«Bas prokýratýra kasasıalyq narazylyq engizdi. Nátıjesinde kasasıalyq sot amnıstıany qoldanýdy joıyp, bastapqy úkimdi — jeti jyl bas bostandyǵynan aıyrýdy qalpyna keltirdi», – dep túsindirdi vedomstvonyń baspasóz qyzmeti.
Bas prokýratýrada amnıstıa sottalǵan adam zańnyń mindetti shartyn — keltirilgen zalaldy tolyq kólemde ótemegen jaǵdaıda qoldanylmaıtynyn atap ótti.
Buǵan deıin Qaraǵandy oblysynda sot qatelikpen qaıtalap alaıaqtyq jasaǵan áıeldi amnıstıalaǵany habarlanǵan bolatyn.
Keshe Qazaqstanda Prezıdent Qasym-Jomart Toqaevtyń bastamasymen ótken el táýelsizdigi tarıhyndaǵy alǵashqy ákimshilik amnıstıanyń qorytyndysy shyǵaryldy. Bas prokýror Berik Asylovtyń málimetinshe, bar bolǵany bir aıdyń ishinde memleket 1,3 mln is boıynsha 681,7 myń azamatty ákimshilik jazadan tolyq bosatqan. Esepten shyǵarylǵan aıyppuldardyń jalpy somasy 22,8 mlrd teńgeni qurady.