Qazaqstannyń Bas prokýratýrasy azamattardy keń taraǵan alaıaqtyq sqemasynan saqtandyrdy: qylmyskerler ózderin Ulttyq Bank qyzmetkerleri retinde tanystyryp, alaıaqtardan qorǵaımyz degen syltaýmen adamdardyń aqshasyn ıemdenip ketedi, dep habarlaıdy infohub.kz saıty.

Qadaǵalaý organynyń dereginshe, sońǵy bir jarym aıda el boıynsha osyndaı 39 fakti tirkelgen.

Máselen, 2026 jylǵy 17 qyrkúıekte Ulytaý oblysy polısıa departamenti Jezqazǵan qalasynyń turǵynynan aqsha urlandy degen fakti boıynsha sotqa deıingi tergeý bastady.

«Qylmyskerler ózderin Ulttyq Bank qyzmetkerleri retinde tanystyryp, er adamǵa alaıaqtar onyń jeke derekterin ıemdenip alyp, shottaryndaǵy aqshany urlamaq bolyp jatqanyn aıtty», — dep málimdedi Bas prokýratýrada.

Alaıaqtarǵa sengen er adam olardyń nusqaýymen depozıtterindegi barlyq aqshany alyp, ony «qaýipsiz etý» úshin úshinshi tulǵalarǵa aýdaryp jibergen. Keltirilgen shyǵyn 9 mln teńgeni qurady.

Qazirgi tańda osy fakti boıynsha sotqa deıingi tergeý jalǵasyp jatyr.

Bas prokýratýra azamattardy saq bolýǵa shaqyrady.

«Ulttyq Bank pen ózge de memlekettik organdardyń qyzmetkerleri telefon arqyly nesıe rásimdeýdi, múlikti satýdy nemese alaıaqtardan qorǵaımyz degen syltaýmen aqshany úshinshi tulǵalarǵa aýdarýdy talap etpeıdi. Bógde adamdarǵa SMS-kodtardy, qupıasózderdi, bank kartalarynyń derekterin jáne aqshańyzǵa qol jetkizýge múmkindik beretin ózge de málimetterdi aıtpańyz», — dep eskertti vedomstvoda.