Qazaqstanda eń aýyr quqyq buzýshylyqtardan zardap shekken azamattar zardap shekkenderge ótemaqy tóleý qorynan alǵashqy memlekettik qarjylyq qoldaý ala alady. Tólem mólsheri 30-dan 50 aılyq eseptik kórsetkishke deıin, dep habarlaıdy infohub.kz saıty.
Bas prokýratýranyń baspasóz qyzmeti túsindirgendeı, elde «Zardap shekkenderge ótemaqy tóleý qory týraly» zań qoldanysta. Ol eń aýyr quqyq buzýshylyqtardan zardap shekken azamattarǵa alǵashqy memlekettik qarjylyq qoldaý kórsetýge baǵyttalǵan.
«Bul tólem — memleket tarapynan beriletin materıaldyq kómek. Ol kináliniń anyqtalǵanyna, jaýapkershilikke tartylǵanyna jáne zıandy ótegenine qaramastan tólenedi», — dep atap ótti qadaǵalaý organynda.
Zańnamada aqshalaı qarajat alýǵa quqyǵy bar azamattar sanattary naqty belgilengen. Olardyń qatarynda jynystyq zorlyq-zombylyq qurbandary bolǵan kámeletke tolmaǵandar; adam saýdasy men azaptaý qurbandary; densaýlyǵyna aýyr zıan keltirilgen adamdar, sondaı-aq qylmys saldarynan AITV/JITS juqtyrǵandar bar. Sonymen qatar, zardap shekken adam qaıtys bolǵan jaǵdaıda onyń zańdy ókilderi, ıaǵnı jaqyn týystary tólem alýǵa quqyly. Tıisti baptardyń tizbesi zańda kórsetilgen.
Tólem birjolǵy bolyp tabylady, onyń mólsheri aılyq eseptik kórsetkish negizinde esepteledi jáne qylmys sanatyna qaraı 30-dan 50 AEK-ke deıin quraıdy. Ótinish berý merzimi adamdy zardap shekken dep tanyǵan kúnnen bastap úsh jyl.
«Qylmystyq qýdalaý organy adamdy zardap shekken dep taný týraly qaýly shyǵarǵan kezde oǵan Qordan ótemaqy alý quqyǵy men ótinish berý tártibin jazbasha túsindirýge mindetti. Banktik shotyn kórsetip, ótinishti isti júrgizip otyrǵan tergeýshige berýge bolady. Tólem is júrgizý qujattarynyń paketi qalyptasqannan keıin Qazynashylyq tarapynan qolma-qol aqshasyz tártippen júzege asyrylady», — dep túsindirdi Bas prokýratýrada.
Qadaǵalaý organy bul qarjylyq kómekti alý azamatty kináli adamnan materıaldyq jáne moraldyq zıandy tolyq óteýdi sot tártibimen talap etý quqyǵynan aıyrmaıtynyn qosty.