«Bashqurt soda kompanıasy-Qazaqstan» 2025 jyly 76,1 mln teńge shyǵynǵa ushyrady. Bul aldyńǵy jylmen salystyrǵanda bir jarym eseden astamǵa artyq (2024 jyly shyǵyn 49,6 mln teńge bolǵan), dep habarlaıdy infohub.kz.
Qarjylyq eseptilikke sáıkes, 2025 jyly «Bashqurt soda kompanıasy-Qazaqstan» eshqandaı kiris almaǵan, al 2024 jyly bul kórsetkish 347 myń teńgeni quraǵan. Kompanıanyń jınaqtalǵan jabylmaǵan shyǵyny 2025 jyldyń sońynda 878,5 mln teńgege jetken.
Qazaqstandyq enshiles kompanıanyń jalǵyz ıesi — Sterlıtamaqtaǵy reseılik «Bashqurt soda kompanıasy». Negizgi qyzmet túri — hımıalyq zattar men hımıalyq ónimderdiń kóterme saýdasy.
Ashyq derekkózderde «Bashqurt soda kompanıasy» Reseıdegi as sodasynyń eń iri óndirýshisi retinde atalady, naryqtyń 85%-yn baqylaıdy. Kompanıa ónimderi qazaqstandyq dúkenderde keńinen usynylǵandyqtan, jetkizilimder endi tikeleı Reseıden júzege asyrylyp, qazaqstandyq bólimsheni aınalyp ótýi múmkin.
2025 jyldyń maýsymynda Bashqurtstan úkimeti «Bashqurt soda kompanıasy» aksıalarynyń 53%-yn «Rosqım» holdıńine satty. Bul pakettiń 11,7%-y Bashqurtstan bıligine senimgerlik basqarýǵa berilgenin eskersek, sońǵylar 50,1% aksıany baqylaıdy.
Buǵan deıin «Kommersant» pen Forbes «Rosqımdi» mıllıarder Arkadı Rotenbergtiń otbasy basqaratynyn habarlaǵan. Rotenberg Forbes-tiń reseılik tiziminde $5,3 mlrd baılyǵymen 34-orynda tur. Alaıda kásipkerdiń baspasóz qyzmeti bul aqparatty joqqa shyǵarǵan.
2020 jyly Bashqurtstanda kompanıanyń jańa jerde soda óndirýdi bastaý josparyna baılanysty ekologtar men jergilikti turǵyndardyń narazylyq aksıalary bastaldy. Janjal prezıdent Vladımır Pýtınniń aralasýynan keıin sheshildi, ol BSK prıvatızasıasynyń zańdylyǵyn tekserýdi tapsyrdy.
Bashqurtstan bıligi prıvatızasıadan kelgen zalaldy 34 mlrd rúblge (jarıalaý kezindegi Ulttyq bank baǵamy boıynsha 197,9 mlrd teńge) baǵalady, al Bas prokýratýra menshik ıesiniń aýysýy memlekettiń erkine qarsy júrgizilgenin kórsetip, talap-aryz berdi.
2021 jyldyń naýryzynda sot BSK aksıalarynyń 95,72%-yn Rosımýshestvo paıdasyna berdi. Alaıda 2025 jyldyń naýryzynda Pýtın BSK-ny strategıalyq kásiporyndar tiziminen alyp tastady, sodan keıin kezekti prıvatızasıa ótti.