2024 jyly Pensılvanıa shtatynyń Batler qalasynda ótken Donald Tramptyń saılaýaldy mıtıńisinde oq tıgen Djım Kopenhaver qaıtys boldy, dep habarlaıdy infohub.kz saıty.
Tramp óziniń Truth Social áleýmettik jelisindegi jazbasynda Kopenhaverdi «naǵyz amerıkandyq patrıot» dep atady. «Eki jyldan astam ýaqyt buryn Pensılvanıanyń Batler qalasynda jyndy qarýly adam bizdiń «Amerıka birinshi» qozǵalysymyzdy basyp-janshýǵa árekettendi. Alaıda Djım men elimizdi súıetin taǵy da kóptegen keremet patrıottar Bostandyq, Erkindik jáne Ádilet degen ortaq qundylyqtarymyzdy qorǵaýda birlik tanytty», — dedi Tramp. «Júregimiz ben duǵamyz Kopenhaver otbasymen, ásirese onyń keremet jubaıy Merıanmen birge».
Kopenhaver otbasynyń advokaty onyń AQSH-qa degen adaldyǵy «ómiriniń aıqyndaýshy bóligi» bolǵanyn aıtty. «Ardager retinde ol qarýly kúshter qatarynda elimizge adal qyzmet etti, Otanyna degen súıispenshiligi eshqashan selqostanǵan emes», — dedi zańger Bı-bı-sıdiń amerıkalyq seriktesi Sı-bı-es nústiń habarlaýynsha.
Batlerdegi mıtıńiden bir jyl ótken soń Sı-bı-es núske bergen suhbatynda Kopenhaver men oq tıgen úshinshi qatysýshy Devıd Dach jaraqattan keıin ınfeksıalar men otalardy bastan ótkergenderin aıtqan. Kopenhaver qoly men ishinen jaralanǵan. Bir jyldan keıin oq onyń denesinde omyrtqasynyń qasynda qalyp qoıǵanyn, sol sebepti taıaqpen júretinin ol Sı-bı-es núske aıtqan.
Dach pen Kopenhaver maýsym aıynda federaldyq úkimetke olardyń qaýipsizdigin qamtamasyz ete almaǵany úshin zalal ótemaqysyn talap etip sotqa júgingen. Olardyń paıymdaýynsha, Qupıa qyzmet olardyń qaýipsizdigin qamtamasyz ete almaǵandyqtan, jaraqattary úshin jaýapty.
AQSh Ókilder palatasyndaǵy respýblıkashyldar da juma kúni Kopenhaverge qurmet kórsetip, áleýmettik jelidegi jazbasynda: «Djım tózgisiz qıyndyqty kúsh-jiger men tabandylyqpen bastan ótkerdi», — dep jazdy.