24 shildede ısraıldik qonystanýshylar men áskerler basyp alynǵan Batys Jaǵalaýdaǵy Nablýs qalasy mańyndaǵy Tal qalashyǵyna shabýyl jasady. Shabýyldan tórt palestınalyq kóz jumyp, taǵy tórteýi jaralandy. Onyń úsheýiniń jaǵdaıy óte aýyr, dep habarlaıdy infohub.kz saıty.
Palestına Densaýlyq saqtaý mınıstrliginiń málimetinshe, jaralylardyń úsheýiniń hali asa aýyr. Israıldik dárigerler bolsa, bir qonystanýshynyń qaza tapqanyn jáne birneshe adamnyń jaralanǵanyn rastady.
Jergilikti jáne qaýipsizdik kózderiniń aıtýynsha, Tal mańyndaǵy zańsyz Havat Gılad eldi mekeniniń turǵyndary aldymen qalashyqtyń shyǵys bóligine shabýyl jasap, eki úıge kirmek bolǵan. Palestınalyqtar úılerin qorǵaýǵa shyqqanda, olarǵa oq jaýdyrylǵan.
Tal qalashyǵynan shyqqan Fath partıasynyń jergilikti basshysy Issam Saıfıdiń Reuters agenttigine bergen málimetinshe, 25-30 adamnan turatyn ısraıldik qonystanýshylar toby aldymen shyǵys aýdanǵa shabýyl jasap, eki úıge kirýge árekettengen. Turǵyndar qarsy shyqqanda, qonystanýshylar oq ashqan. Jarty saǵattan soń qaıta oralǵan ısraıldikter batys bólikke shabýyl jasap, bir balany qarýmen urǵan. Sodan keıin tártipsizdik bastalyp, Israıl áskeri kelip, qonystanýshylarmen birge oq atqan.
Alaıda Israıl armıasy Havat Gılad mańynda serýendep júrgen ısraıldikterge shabýyl jasaldy degen jeleýmen ásker jiberilgenin habarlady. Áskerılerdiń aıtýynsha, bir palestınalyq jergilikti qaýipsizdik qyzmetkerleriniń qarýyn ıemdenip, ısraıldikterge oq atqan.
Israıldiń Magen Davıd Adom (MDA) qutqarý qyzmetiniń dereginshe, bir ısraıldik qaza taýyp, eki jaraly tikushaqpen evakýasıalanǵan.
Nablýstan habarlaǵan Ál-Jazıra tilshisi Nıda Ibrahımniń aıtýynsha, ısraıldik qonystanýshylar serýendeımin degen jeleýmen Tal qalashyǵyna basyp kirgen. Ol qonystanýshylardyń qarýly ekenin jáne palestınalyqtardy arandatyp, jerlerin tartyp alatynyn atap ótti. Keıde olardyń treılermen kelip, ýaqytsha shatyrlar tigip, keıin zańsyz eldi mekenderge aınaldyratynyn da tilshi jetkizdi.
Oqıǵadan keıin Israıl áskeri Nablýs pen Taldyń aınalasyna qaýipsizdik shebin ornatty. Ibrahımniń aıtýynsha, mundaı jaǵdaılarda Israıl armıasy ádette qalany qorshaýǵa alyp, jaraly palestınalyqtardyń medısınalyq kómek alýyna kedergi keltiredi. Qazir Talǵa aparatyn barlyq beketter jabylǵan.
Palestına Densaýlyq saqtaý mınıstrliginiń dereginshe, bıylǵy jyly Batys Jaǵalaýda Israıl tarapynan qaza tapqan palestınalyqtardyń sany 86-ǵa jetken, onyń 21-in qonystanýshylar atqan.
Palestına Syrtqy ister mınıstrligi bul qyrǵyndy qatań aıyptap, ony jalǵasyp jatqan Nakbanyń jańa kórinisi dep atady. Mınıstrlik basyp alýshy bılik pen qonystanýshylardyń úılesimdi qylmystaryn, sondaı-aq bul qylmystardyń ádeıi ýshyqtyrylǵanyn aıyptady.
Israıl premer-mınıstri Bınámın Netanáhý Tal mańynda bir ısraıldiktiń óltirilýine baılanysty qatań shara qoldanýǵa ýáde berip, jedel jıyn ótkizetinin málimdedi. Israıldiń ońshyl qarjy mınıstri Besalel Smotrıch bolsa, áskerdi palestınalyq qalashyqqa qatysty «temir judyryqpen» áreket etýge shaqyrdy. Smotrıch X áleýmettik jelisindegi jazbasynda «sharýashylyqtar men qaharman qonystanýshylar Israıl memleketiniń qorǵanys qabyrǵasy» ekenin atap, olardy nyǵaıtyp, qurmetteýdi jalǵastyratynyn aıtty.