Anaǵa tilek
Jetkizip armanǵa jol kúni búgin,
Baq qushty qyzyń menen búgin ulyń.
Bolǵanmen bar bolmysyń qarapaıym,
Baıqalyp turady, ana, ulylyǵyń!

Bolmasyn dedik te ár kez júzi muńdy,
Eńbekti ul, beınetińdi qyz uǵyndy.
Qylsyn dep uzaǵynan otyrasyń
Táńirden surap alǵan qyzyǵyńdy.

Jan - jaǵyń tolyp bizben bútin búgin,
Bolǵanda kúniń sátti - utymdy kún.
Sonda ár kez táńirińe táýba desip,
Tilińnen úzilmeıdi shúkirligiń.

Qyzyǵyn qyzyqtaýmen nemereniń,
Este ár kez aq besikke bólegeniń.
Qýandyń talaı toıda shańyraq pen
Jazylǵan shattyǵyna keregeniń.

Oıatyp bolashaqqa senimderin,
Ózińdi qadir tutty kelinderiń.
Báıek bop júresiń - aý, urpaqtardyń
Bolmasa degendeı - aq kózinde muń.

Bolǵandaı tirshilikte baǵyń bala,
Ul - qyzyń - ómirdegi taýyń dara.
Solardyń qyzyǵyna kýá bolyp,
Aman júr ortamyzda,
aýyrma, ana!

Bekitip shóbereńniń buǵanasyn,
Toı bolsyn áli talaı ulan - asyr!
Qyzyqtap sol toılarda otyrsynshy
Qazaqtyń qarapaıym bir anasy!

Avtory:
Ǵabıden QOJAHMET,
Qyzylorda qalasy