Germanıanyń ońtústik-shyǵysyndaǵy Baıroıt qalasynda ótip jatqan Rıhard Vagner festıvalinde jasandy ıntellekt qatysqan qoıylym kórermenniń yzasyn týdyrdy. Kórermenderdiń bir bóligi qoıylymdy túsinbegendeı boldy.
Senbi kúni keshke «Qudaılardyń kúıreýi» operasynyń qoıylymy aıaqtalǵanda, sahnaǵa kýrator Markýs Lobbes pen onyń komandasy shyqqanda, olardy ysqyryq pen yzaly daýyspen qarsy aldy. Bul týraly Germanıanyń dpa agenttigi habarlady. Alaıda ánshiler men mýzykanttar, ásirese dırıjer Krıstıan Tılemann jyly qoshemetke ıe boldy.
Festıvál uıymdastyrýshylary qoıylym aldynda bul jasandy ıntellekttiń sahnaǵa alǵash ret qatysýy bolatynyn, «keıipker retinde emes, sýret generasıalaıtyn kúsh retinde» qatysatynyn málimdegen. Olar ánshiler «jaryq, tekstýra, tarıh jáne asosıasıalardan turatyn qaınaǵan kosmostyń ishindegi turaqty núkte» bolatynyn, al proeksıalar únemi ózgerip, bir-birine aǵyp jatqanyn aıtqan.
Jasandy ıntellekt kómegimen jasalǵan proeksıalar Vagnerdiń «Nıbelýng saqınasy» sıkliniń aldyńǵy qoıylymdarynan alynǵan kórinister men tarıhı taqyryptardy qamtydy. Dortmýndtaǵy Teatr jáne sıfrlyq akademıanyń dırektory Lobbes pen onyń komandasy aldyn ala tańdaǵan sýretter paıdalanyldy. Tehnologıa sahnaǵa proeksıalaǵan kollaj kórermendi abdyratqanyn dpa habarlaıdy. Onda Germanıanyń burynǵy kansleri Gelmýt Koldiń, 2001 jylǵy 11 qyrkúıektegi lańkestik shabýyldan keıingi Búkilálemdik saýda ortalyǵynyń munaralarynyń jáne 1990 jyly Germanıanyń birigýine arnalǵan arnaıy poshta markasynyń sýretteri bolǵan.
Festıvál saıtynda «ár qoıylym biregeı bolady — óıtkeni sýretter men asosıasıalar eshqashan toqtamaıdy» delingen. Taǵy eki qoıylym josparlanǵan.