Báısheshek - úkili úmittiń nyshany
Erte zamanda jer betinde qatal qys uzaq aıaldap, qaqaǵan aıaz ketpeı turyp alady. Sol zamanda taý bókterinde ornalasqan jertólede bir shaǵyn otbasy ómir súripti. Otaǵasy januıasyn asyraý úshin jumys izdep jer dúnıeni sharlap ketedi. Áıeli men eki perzenti ony kútýmen bolady. Kúnderdiń kúninde qańtar aıynyń aıaǵynda ul bala qatty naýqastanyp qalady. Ábden sharasy taýsylǵan ana táýiptiń kómegine júgingen eken. Táýip áıel onyń keseliniń sebebin anyqtaıdy. Ol sábıdi emdeý úshin jańa ósip turǵan gúlder men japyraqtar kerek ekendigin málimdeıdi. Anasy men baýyrynyń qaıǵysyna shydaı almaǵan ápkesi emshige kerekti ósimdikterdi izdep jolǵa shyǵady. Qarasa, aınalanyń bári muzben shyrmalyp, qalyń qarmen kómkerilgen. Boıjetkenniń boıyn úreı bılep alady da, ne isterin bilmeı, otyra qalyp, qatty jylaıdy da, Qudaıǵa jalbaryna bastaıdy. Júrekten shyqqan ystyq jastar qardy tesip, jerdiń túbine jetedi de, názik gúlderdi - báısheshekterdi oıatady. Olar qardyń qalyń qabatyn tesip, ózderine jol salyp, aqyrynda jer betine shyǵa keledi. Qyzdyń jasy tamǵan jerlerdiń bári ádemi aq gúldermen árlenedi. Sulý boıjetken olardy terip alyp, úıine alyp barady da, inisi aman qalady. Sodan beri báısheshek - úkili úmittiń nyshany sanalatyn bolǵan eken.