Qazaqstandaǵy Beeline operatoryn ıelenetin «KaR-Tel» kompanıasy birinshi sanattaǵy tólem uıymynyń lısenzıasyn alýǵa nıetti. Bul mártebe oǵan zańdy tulǵalardyń shottaryn ashýǵa, tólem kartalaryn shyǵarýǵa jáne bankaralyq tólemder júıesine qosylýǵa jol ashady, dep habarlaıdy infohub.kz saıty.
Tólem qyzmetteri men tólem ınfraqurylymyn damytýǵa baǵyttalǵan tıisti yntymaqtastyq memorandýmy Central Asia Fintech Summit 2026 alańynda jasaldy. Qujatqa Ulttyq bank, halyqaralyq VEON kompanıasy jáne VEON tobyna kiretin «KaR-Tel» qol qoıdy.
Kelisim boıynsha VEON holdıńiniń kompanıalary birinshi sanattaǵy tólem uıymynyń lısenzıalaryn alady. Sonymen qatar taraptar tólem qyzmetterin jetildirý jáne zamanaýı sıfrlyq tólem servısterin engizý jóninde birlesip jumys isteýdi josparlap otyr.
Ulttyq bank tóraǵasynyń orynbasary Bınur Jalenov buǵan deıin túsindirgendeı, tólem uıymynyń lısenzıasy depozıt ashý men nesıe berýden basqa, banktik qyzmetterdiń barlyq túrin kórsetýge quqyq beredi. Tólem uıymy jeke jáne zańdy tulǵalardyń shottaryn ashyp, karta shyǵara alady jáne biryńǵaı QR-kod arqyly tólemder júrgize alady.
VEON tobyna kiretin «KaR-Tel» Qazaqstanda Beeline brendimen uıaly baılanys operatory retinde jumys isteıdi. Kompanıa óziniń tólem servısin de damytyp keledi: 2021 jyly Simply mobıldi neobanki iske qosylǵan. Onyń qosymshasynda vırtýaldy karta ashyp, túrli tólem men aýdarym jasaýǵa bolady.
Buǵan deıin VEON bas dırektory Kaan Terzıoglý kompanıa qazaqstandyq Kaspi.kz fınteh-kompanıasymen, sondaı-aq Yandex brendimen jumys isteıtin jergilikti taksı servısterimen básekelesýge nıetti ekenin málimdegen.