Beeline Qazaqstan, álemdik sıfrlyq operator VEON jáne Qazaqstan Ulttyq Banki tólem qyzmetteri salasyndaǵy yntymaqtastyq týraly memorandýmǵa qol qoıdy. Qujat bes jylǵa arnalǵan jáne taraptardyń tólem qyzmetteri salasyndaǵy negizgi yntymaqtastyq baǵyttaryn, sondaı-aq sıfrlyq servısterdi Qazaqstannyń ulttyq tólem jáne sıfrlyq qarjy ınfraqurylymymen ıntegrasıalaý múmkindikterin zerdeleýdi aıqyndaıdy, dep habarlaıdy infohub.kz saıty.
Yntymaqtastyq baǵyttarynyń biri — Beeline-nyń eldiń tólem naryǵyndaǵy qatysýshy retindegi odan ári damýy. Kompanıa birinshi sanattaǵy tólem uıymy mártebesin alǵan naryqtyń alǵashqy qatysýshylarynyń qataryna kirýdi kózdep otyr. Mundaı mártebe alý Qazaqstanda tólem servısterin damytýǵa qosymsha múmkindikter týǵyzady.
Memorandým Almatyda ótken Central Asia Fintech Summit aıasynda jasaldy. Bul — Qazaqstan Ulttyq Banki, Ulttyq tólem korporasıasy jáne Kazakhstan Fintech Network uıymdastyrǵan aımaqtyń qarjy-tehnologıalyq sektoryndaǵy negizgi is-sharalardyń biri.
«Qazaqstan zamanaýı ulttyq tólem ınfraqurylymyn dáıekti túrde damytyp keledi, biz úshin osy transformasıanyń bir bóligi bolý mańyzdy. Beeline kompanıalar toby tólem servısterinde aıtarlyqtaı tájirıbege ıe, al VEON — halyqaralyq tehnologıalyq tájirıbe men aýqymdy sıfrlyq ekosıstemaǵa. Osy múmkindikterdi ulttyq tólem ınfraqurylymymen biriktirý mıllıondaǵan paıdalanýshy úshin jańa, qolaıly ári qoljetimdi qarjy servısterin jasaýǵa jol ashady. Bizdiń mindetimiz — tólemder men aýdarymdardy klıenttiń kúndelikti sıfrlyq tájirıbesiniń tabıǵı bóligine aınaldyrý: qarapaıym, jyldam jáne qaýipsiz», — dedi Beeline Qazaqstan holdıńiniń bas dırektory Djabbor Kaıýmov.
Yntymaqtastyqtyń taǵy bir baǵyty — VEON tobynyń kompanıalarynyń Ulttyq tólem korporasıasynyń jekelegen servısteri men ınfraqurylymdyq sheshimderin paıdalaný múmkindikterin zerdeleý. Bul tólemder men aqsha aýdarymdaryn júrgizý quraldaryn, sondaı-aq qarjy naryǵy qatysýshylarynyń ózara is-qımyly men esep aıyrysý sheshimderin qamtýy múmkin.
Yntymaqtastyq taraptarǵa VEON-nyń sıfrlyq ekosıstemasynda Qazaqstannyń ulttyq tólem ınfraqurylymy men toptyń halyqaralyq tájirıbesin paıdalana otyryp, jańa qarjy servısterin jasaý múmkindikterin zerdeleýge múmkindik beredi. Bul rette árbir joba jeke regýlátorlyq, zańdyq jáne tehnıkalyq saraptamadan ótip, barlyq qajetti talaptar men rásimder oryndalǵannan keıin júzege asyrylatyn bolady.
VEON — 150 mln-nan astam baılanys qyzmeti klıenti men 228 mln-nan astam sıfrlyq platforma paıdalanýshysyna qyzmet kórsetetin sıfrlyq operator. Kompanıa álem halqynyń 6%-dan astamy turatyn 5 elde jumys isteıdi jáne adamdarǵa kómektesip, ekonomıkalyq ósýge yqpal etetin tehnologıalyq servısterdi damytady. Kompanıa Qazaqstanda telekomýnıkasıalyq, qarjy, sıfrlyq jáne tehnologıalyq servısterdi damytatyn Beeline sıfrlyq operatory arqyly usynylǵan.