Qazaqstannyń Ulttyq qaýipsizdik komıteti Bek Air áýekompanıasynyń naqty ıesi Nurlan Jumasultanovqa qatysty qylmystyq isti tergep jatyr. Ol asa iri mólsherde avıasıalyq qozǵaltqyshtardy urlady dep kúdikke ilingen. Tonalǵan agregattardyń bireýi keıin tasymaldaýshynyń ushaǵyna ornatylǵan, dep habarlaıdy infohub.kz saıty.
İstiń mán-jaıyn jýrnalıs Mıhaıl Kozachkov óziniń Telegram-arnasynda jarıalady. Onyń málimetinshe, Jumasultanov ustalyp, 9 qyrkúıekte Almatynyń tergeý soty ony eki aıǵa qamaýǵa alýǵa sanksıa bergen.
«Apatqa ushyraǵan «Fokker-100» ushaǵynda urlanǵan qozǵaltqyshtardyń bireýi turǵan — ony nómiri boıynsha anyqtady. Iaǵnı, bireý aýyr agregatty konservasıalanǵan ushaqtan alyp, ony Bek Air-ge tıesili laınerge aýystyryp qoıǵan. Biraq muny kim istegen bolýy múmkin? Bul suraqqa jaýapty kóliktegi polısıa departamentiniń qyzmetkerleri birneshe jyl boıy izdestirdi, onyń ishinde shetelge de halyqaralyq tapsyrmalar jiberdi», — dep jazdy Kozachkov.
Jýrnalısiń dereginshe, bıylǵy jyly Bas kólik prokýratýrasy bul is boıynsha is júrgizýdi Ulttyq qaýipsizdik komıtetine bergen.
«Al UQK-de aqyry kúrdeli rebýsty sheshýge qol jetkizdi. Olar urlanǵan qozǵaltqyshtardyń bireýi Bek Air ushaǵynda turǵandyqtan, buǵan áýekompanıanyń ıeleri nemese basshylary qatysty bolýy múmkin degen qorytyndyǵa keldi», — dedi Kozachkov.
Osydan keıin Nurlan Jumasultanovty jaýap alýǵa shaqyryp, kúdikti dep tanyp, ustaǵan. Kozachkovtyń málimetinshe, istiń taǵy bir fıgýranty úıqamaqqa alynǵan.
Jumasultanovqa Qylmystyq kodekstiń 188-babynyń 4-bóligi — asa iri mólsherde urlyq jasaý aıyptalyp otyr. Baptyń sanksıasy múlki tárkilenip, bes jyldan 10 jylǵa deıin bas bostandyǵynan aıyrýdy kózdeıdi.
Bas kólik prokýratýrasy «Kýrsıvke» isti UQK-niń ortalyq apparaty tergep jatqanyn, qadaǵalaýdy BKP júzege asyratynyn rastady.
«İsti UQK-niń ortalyq apparaty tergep jatyr, qadaǵalaýdy BKP júrgizedi», — delingen vedomstvo habarlamasynda.
Prokýratýra Qylmystyq is júrgizý kodeksiniń 201-babyna sáıkes ózge aqparatty jarıalamady.