Qazaqstan Premer-mınıstri Oljas Bektenov úkimet otyrysynda mınıstrlik basshylary men ákimderge birqatar tapsyrma berip, olardyń jeke jaýapkershiligin eskertti, ...dep habarlaıdy infohub.kz saıty.
Ol Ulttyq jobanyń iske asyrylýy prezıdenttiń jeke baqylaýynda ekenin eske saldy.
Birinshi tapsyrma óńirlerdegi kelisimsharttardy ýaqtyly jasasý jáne qarjylandyrý alýǵa qatysty. Bektenov ákimdikterge eki apta ishinde aǵymdaǵy jylǵy jobalar boıynsha shara qabyldaýdy, al ónerkásip jáne qurylys, energetıka, ulttyq ekonomıka mınıstrlikterimen birlesip jyl sońyna deıin barlyq josparlanǵan jóndeý naýqandaryn aıaqtaýdy qamtamasyz etýdi tapsyrdy. Oblys ákimderi buǵan jeke jaýapty. Ónerkásip jáne qurylys mınıstrligine ınfraqurylymdyq jobalardyń jobalaý-smetalyq qujattamasyna memlekettik saraptamany jyldamdatý júkteldi.
Ekinshi tapsyrma: mınıstrlikter 1 qyrkúıekke deıin jańa óndirister qurý jáne qoldanystaǵy óndiristerdi keńeıtý boıynsha áleýetti offteık-kelisimsharttar jasasý jumysyn jedeldetýi qajet.
Úshinshi: energetıka jáne komýnaldyq sektorlardaǵy sıfrlyq quraldar. Ónerkásip jáne energetıka mınıstrlikterine biryńǵaı sıfrlyq platforma Smart Turmys engizýdi jedeldetý tapsyryldy. 1 qyrkúıekke deıin tutynýshylar toptaryna bóle otyryp, komýnaldyq resýrstardyń esepteý aspaptary men baǵdarlamalyq qamtamasyz etýge biryńǵaı standarttar qabyldaý kerek.
«Báıterek» holdıńine 1 qyrkúıekke deıin aǵymdaǵy jyldyń sońyna deıin málimdelgen barlyq jobalardy dereý qarjylandyrýdy qamtamasyz etý tapsyryldy.
Premer-mınıstr barlyq óńirlik ákimdikterge 1 qyrkúıekke deıin 2027 jylǵy jobalar boıynsha tıisti ótinimderdi Ulttyq jobanyń elektrondyq platformasyna (MEKS) jiberýdi jáne olardy múddeli taraptarmen kelisýdi qamtamasyz etýdi tapsyrdy.