Jergilikti bıliktiń málimetinshe, órt sóndirýshiler Belgıa tarıhyndaǵy eń iri órtti sóndirý úshin túni boıy jumys istedi. Jeksenbi tańerteń órt 3 000 gektar jerdi sharpyp, Germanıa shekarasyna qaraı bet alǵan.
Eldiń shyǵysyndaǵy tabıǵı qoryq — Joǵarǵy Fendegi órt juma kúninen beri jalǵasyp keledi. Ony Belgıanyń túkpir-túkpirinen jáne kórshiles Germanıa men Lúksembýrgten kelgen órt sóndirýshiler, sondaı-aq ásker men fermerler tejeýge tyrysýda.
Belgıanyń Vallonıa aımaǵy ákimshiliginiń ókili Stefanı Ernýdyń Reuters agenttigine aıtýynsha, jeksenbi kúni qutqarýshylar Germanıaǵa qaraı jyljyp bara jatqan órttiń aldyńǵy shebine nazar aýdaryp, salqyn ári ylǵaldy aýa raıy órtti tejeýge kómektesedi dep úmittenýde.
Eýropalyq orman órti týraly aqparat júıesiniń derekterine sáıkes, bul órt 2011 jyly 1400 gektarǵa jýyq jerdi sharpyǵan órtten eki eseden astam úlken.
Germanıanyń Belgıa shekarasyna jaqyn ornalasqan Monshaý qalasy jeksenbi kúni órttiń Germanıa aýmaǵyna taralmaıtynyn, biraq aýanyń qatty lastanýy múmkin ekenin habarlady. Qala saıtyndaǵy málimdemede: «Sondyqtan shekaraǵa jaqyn aýdandardyń turǵyndaryna bul aýmaqtardy tastap ketýge keńes berý týraly sheshim qabyldandy», — delingen.
Belgıa shuǵyl kúsheıtýdi suraǵannan keıin EO senbi kúni Eýropanyń ártúrli aımaqtarynan úsh tikushaq pen eki sý shashatyn ushaq jiberdi.
Jergilikti bılik evakýasıalanǵan aýyldardy órtten qorǵaıtyn qorǵanys jelisi jeksenbi kúni áli de ustap turǵanyn, biraq senbi kúni evakýasıalanǵan turǵyndarǵa áli úılerine oralýǵa bolmaıtynyn aıtty. Lej gýbernatorynyń keńsesiniń habarlaýynsha, «qazirgi ýaqytta úılerge zaqym kelmegen, degenmen órt jaqyn jáne tútin deńgeıi aıtarlyqtaı joǵary».
Bul órt Belgıa men basqa da Eýropa elderi osy aptada jazdyń besinshi ystyq tolqynyn bastan ótkerip jatqan kezde tutandy. Ǵalymdardyń aıtýynsha, adam áreketinen týyndaǵan klımattyń ózgerýi órttiń tez taralýyna jáne uzaq janýyna múmkindik beretin ystyq jáne qurǵaq aýa raıynyń yqtımaldyǵyn arttyrdy.