Сербия астанасы Белградта сәрсенбіге қараған түнде Израиль елшілігінің сыртында полицейге пышақпен шабуыл жасаған жас жігіт атып өлтірілді. Билік бұл оқиғаны «террористік шабуыл» деп атады, деп хабарлайды infohub.kz сайты.
Сербияның ішкі істер министрі Ивица Дачичтің айтуынша, шабуылдаушы екі пышақпен полицейге ұмтылып, «Аллаху Акбар» деп айқайлаған. Полицей бетінен жеңіл жарақат алған, алайда оқ атып, шабуылдаушыны жер қылған.
Министр күдіктінің кім екені әзірге анықталмағанын, бірақ ол кәмелетке толмаған Сербия азаматы екенін және қауіпсіздік қызметтері оны «Ислам мемлекетінің жақтаушысы ретінде танымал» деп бақылауда ұстағанын мәлімдеді.
Елшілік ғимаратының сыртында журналистерге сөйлеген Дачич тергеу жалғасып жатқанын айтты. Ал қауіпсіздік қызметтері күдіктінің Instagram парақшасында «Ислам мемлекеті» туының суретін жариялағанын хабарлады.
Дачич елдегі терроризм қаупі деңгейін «қызыл дабылға» — ең жоғары деңгейге көтерді. Бұл инфрақұрылым нысандары мен адам көп жиналатын жерлерде қауіпсіздік тексерістерінің күшейтіліп, полиция санының арттырылатынын білдіреді.
Ішкі істер министрі жарақат алған полицейдің жағдайын біліп қайтқанын айтты. Ол өзін жақсы сезінеді және жарақатына байланысты ауруханаға жатқызуды қажет етпеді.
Сәрсенбі күні таңертең Израиль елшілігінің сыртында қарулы күзетшілер күзетте тұрғаны байқалды.
Израильдің сыртқы істер министрлігі әлеуметтік желідегі жазбасында елшілік қызметкерлерінің ешқайсысы зардап шекпегенін, оқиға кезінде миссия жабық болғанын растады.
Бұл — Белградтағы Израиль елшілігіне үш жылдан аз уақыт ішінде жасалған екінші осындай шабуыл. 2024 жылдың маусымында бір ер адам полицейдің мойнына арбалеттен оқ атқан болатын. Оқ тиген полицей шабуылдан аман қалып, ислам дінін қабылдаған сербиялық ер адам ретінде анықталған шабуылдаушыны атып өлтірген.
Сәрсенбідегі шабуыл Израильдегі сайлаудан кейін бір күн өтпей жасалды.