Qazaqstanda avtokólik otynynyń quny Eýrazıalyq ekonomıkalyq odaq elderi arasynda eń tómen bolyp qalýda, degenmen sońǵy bir jylda benzın 15,6%-ǵa qymbattady, dep habarlaıdy infohub.kz.
Eýrazıalyq ekonomıkalyq komısıanyń (EEK) derekterine sáıkes, bıylǵy maýsymda respýblıkada benzın baǵasy byltyrǵy sáıkes kezeńmen salystyrǵanda orta eseppen 15,6%-ǵa, al dızel otyny 10,6%-ǵa qymbattaǵan. Al EAEO-nyń basqa elderinde ósim odan da joǵary bolǵan. Máselen, Reseıde benzın 19,9%-ǵa, Qyrǵyzstanda 17,7%-ǵa qymbattasa, dızel tıisinshe 18,1% jáne 26,4%-ǵa qymbattaǵan.
Eń az ósim Belarýste tirkelgen: onda benzın men dızel bir jyl ishinde nebári 3,1%-ǵa qymbattaǵan. Armenıada benzın 18,4%-ǵa, dızel 19%-ǵa qymbattaǵan.
Qymbattaýǵa qaramastan, Qazaqstan EAEO elderi arasynda otynnyń qoljetimdiligi boıynsha kóshbasshylyǵyn saqtap otyr. Dızeldiń bir lıtri orta eseppen 336 teńge turady (maýsymdaǵy baǵam boıynsha 0,69 dollar), al Belarýste — 468 teńge (0,96 dollar), Qyrǵyzstanda — 521 teńge (1,07 dollar), Reseıde — 560 teńge (1,15 dollar), Armenıada — 755 teńge (1,55 dollar).
Benzınde de jaǵdaı uqsas: Qazaqstanda bir lıtr orta eseppen 240 teńge turady. Salystyrý úshin, Belarýste baǵa 458 teńge (0,94 dollar), Qyrǵyzstanda — 468 teńge (0,96 dollar), Reseıde — 477 teńge (0,98 dollar), Armenıada — 711 teńge (1,46 dollar) quraıdy.
EEK sonymen qatar maýsymda Qazaqstanda benzınniń tutyný baǵasy óndirýshilerdiń ortasha baǵasynan 1,6 ese joǵary bolǵanyn atap ótti. Belarýste bul kórsetkish 1,5 ese, Reseıde — 2,3 ese, al Qyrǵyzstanda — 49,1% qurady.
Buǵan deıin Qazaqstan álemdegi eń arzan benzın bar elder tizimine engen bolatyn. Alaıda arzan baǵanyń keri jaǵy da bar: kórshi memleketterge arzan otyndy zańsyz shyǵarý jaǵdaılary tirkelýde.