25 shilde kúni keshke Berlın ortalyǵynda joǵary jyldamdyqpen kele jatqan fýrgon Christopher Street Day (CSD) LGBT-sherýiniń qatysýshylaryna soqtyǵysty. Saldarynan bir adam qaza taýyp, 17 adam jaraqat aldy, dep habarlaıdy infohub.kz.
Qaıǵyly oqıǵa Brandenbýrg qaqpasynyń janyndaǵy Tırgarten saıabaǵynda boldy. Polısıa málimetinshe, kólik adamdardy qaǵyp, artynsha aǵashqa soqtyǵysqan. Kómek qyzmetteri oqıǵa ornyna kelgende, fýrgon bos turǵan.
Segiz adam aýyr jaralansa, úsheýiniń jaǵdaıy asa aýyr dep baǵalanýda.
Bild basylymynyń kýágerlerge silteme jasaýynsha, kólikten bir er adam júgirip shyǵyp, izin sýytqan. Polısıa aýqymdy izdeý jedel-izdestirý sharalaryn bastady. Kúdiktiniń jeke basy anyqtaldy – ol ıslamshyl toptarmen baılanysy bar delinetin 21 jastaǵy Abdýl B. Ol áli qashyqta júr, izdeý jalǵasýda. Oqıǵadan keıin mamandar kólikti jarylǵysh zattarǵa teksergen, alaıda onyń tabylǵany týraly habarlanbady.
Qaıǵyly kúni Berlınde Eýropadaǵy eń iri LGBT-sherýleriniń biri – jyl saıynǵy Christopher Street Day ótip jatqan bolatyn. Oǵan júzdegen myń adam qatysqan. Apattan keıin barlyq merekelik is-sharalar dereý toqtatyldy.
Tergeý oqıǵany ádeıi jasalǵan shabýyl dep qarastyrýda. Qaıǵyly oqıǵanyń mán-jaıy anyqtalýda.
Sońǵy jyldary Germanıa mundaı shabýyldarǵa birneshe ret tap boldy. 2026 jylǵy mamyrda Leıpsıgte júrgizýshi jaıaý júrginshiler aımaǵyna kirip ketip, eki adam qaza tapty. 2025 jyly Mangeım men Múnhende uqsas shabýyldar oryn alsa, 2024 jylǵy jeltoqsanda Magdebýrgtegi Rojdestvo jármeńkesinde birneshe adam kólik soqtyǵysynan qaza boldy.