BI Group holdıńiniń enshiles qurylymy — BI Development qurylys kompanıasy qazaqstandyqtarǵa jyldyq mólsherlemesi 7,75%-ǵa deıingi dollarlyq oblıgasıalarǵa ınvestısıa salýdy usyndy, dep habarlaıdy infohub.kz saıty.
Qazaqstan qor bırjasynda (KASE) kompanıa jalpy kólemi $9 mln bolatyn eki jáne úsh jyldyq dollarlyq oblıgasıalardyń eki shyǵarylymyn ornalastyrady. Baǵaly qaǵazdar $15 mln kólemindegi lıstıńtik shyǵarylymdar sanatyna enedi. Bir qaǵazdyń nomınaldyq quny nebári $100 bolady.
Birinshi shyǵarylym — 2028 jyldyń 29 qyrkúıegine deıin, jyldyq mólsherlemesi 7,5%, somasy $7 mln. Ol boıynsha syıaqy jylyna eki ret tólenedi, al bir qaǵazdyń nomınaly $100 quraıdy.
Ekinshi shyǵarylym — 2029 jylǵa deıin. Úsh jyldyq oblıgasıalar boıynsha mólsherleme 7,75% dep baǵalanyp otyr, kólemi — $2 mln. Bir qaǵazdyń quny da $100 bolady.
Túpkilikti kýpon, ıaǵnı oblıgasıalar boıynsha syıaqy ınvestorlardyń ótinimderi boıynsha saýda-sattyq barysynda aıqyndalady. Ornalastyrý 29 qyrkúıekte ótedi, oblıgasıalardy broker arqyly satyp alýǵa bolady.
Salystyrý úshin: jeke tulǵalarǵa arnalǵan valútalyq depozıtter boıynsha eń joǵary mólsherleme 1% quraıdy. 1 qazannan bastap keıbir salym túrleri boıynsha ol jyldyq 2,5%-ǵa deıin ósedi.
Qazaqstandaǵy dollarlyq oblıgasıalar boıynsha naryqtyq mólsherlemeler emıtenttiń senimdiligi men alańyna qaraı jyldyq 6%-dan 11%-ǵa deıin. Alaıda ornalastyrý kezindegi qaǵazdyń eń tómengi quny, ádette, $100-den joǵary, jáne mundaı oblıgasıalar tek kásibı ınvestorlarǵa qoljetimdi.
Turǵyn jáne komersıalyq jyljymaıtyn múliktiń iri qurylys kompanıasy BI Development BI Group holdıńiniń quramyna kiredi. Onyń majorıtarlyq aksıoneri — bıznesmen Aıdyn Rahımbaev, onyń baılyǵyn Forbes $1,1 mlrd dep baǵalaıdy. Basylym ony qazaqstandyq eń baı bıznesmender tiziminde toǵyzynshy orynǵa qoıady.
Buǵan deıin Freedom Finance kompanıasy AIX bırjasynda mólsherlemesi 8,5% bolatyn úsh jyldyq dollarlyq oblıgasıalardy ornalastyrǵan.