BI Development jarty jylda 56 mlrd teńge tabys tapty

Qazaqstannyń iri qurylys kompanıasy BI Development birinshi jartyjyldyqta 56 mlrd teńge taza paıda tapty, bul ótken jylmen salystyrǵanda 14%-ǵa artyq. Kompanıanyń negizgi tabysy turǵyn úı satýdan tústi, dep habarlaıdy infohub.kz.

AIX-te jarıalanǵan kompanıa eseptiligine ekonomıs Arman Bataev nazar aýdardy. Qurylys kompanıasynyń birinshi jartyjyldyqtaǵy taza paıdasy 56 mlrd teńgeni qurady (jyldyq kórsetkishpen 14%-ǵa ósim). Sonymen qatar kiris 7,3%-ǵa ósip, 341 mlrd teńgege jetti. Nysandardyń ózindik quny 7,8 mlrd teńgege artyp, 238,5 mlrd teńgeni qurady.

Satý shyǵyndary 9%-ǵa ósip, 10,4 mlrd teńge boldy. Ákimshilik shyǵyndar aıtarlyqtaı ósti – 5,5 mlrd teńgege, 35,6 mlrd teńgege deıin. Basqa operasıalyq kiristerdiń de ósýi baıqaldy – 6,3 mlrd teńgege, al shyǵyndar 8,7 mlrd teńgege jetti.

Kompanıanyń jalpy kirisiniń 309 mlrd teńgesi turǵyn úı satýdan tústi (9,3%-ǵa ósim), komersıalyq nysandar boıynsha kiris 29 mlrd teńgeni qurady (13,7%-ǵa tómendeý). Kiristiń 79%-y Qazaqstanda alynǵan.

Sonymen qatar BI Development aktıvteri 19,2%-ǵa ósip, 2,35 trln teńgege jetti. Kompanıanyń salynyp jatqan nysandary 957 mlrd teńgege baǵalanýda (50%-ǵa ósim), jer telimderi – 405,1 mlrd teńge (4%-ǵa tómendeý). Quryltaıshysy Aıdyn Rahımbaev aıtqan qıyndyqtarǵa qaramastan, kompanıa qurylys kólemin ulǵaıtýdy jalǵastyrýda.

Ekonomıs Bataev BI Development-te satyp alýshylardan túsken avanstardyń úlken kólemi bar ekenin atap ótti. Kelisimsharttyq mindettemeler 1,28 trln teńgeden 1,55 trln teńgege deıin, ıaǵnı 21,5%-ǵa ósti. Bul – satyp alýshylardyń jyljymaıtyn múlikke aldyn ala tólemderi, olar nysandar tapsyrylǵan saıyn kiriske aınalady.

BI Development balansynda jeke qorǵa 97,6 mlrd teńge ınvestısıa bar, ótken jyldyń sońynda bul kórsetkish 78,6 mlrd teńge edi. Bul qor aksıonerlerdiń halyqaralyq bıznesine ınvestısıa salady, ınvestısıalardyń basym bóligi BAÁ men AQSH-ta shoǵyrlanǵan.

Esepte BI Development BI Group quramyna kiretini kórsetilgen. Sońǵysynyń túpkilikti baqylaýshy tulǵasy – Aıdyn Rahımbaev, ol $1,1 mlrd baılyǵymen qazaqstandyq eń baı azamattar arasynda toǵyzynshy orynda tur.

Buǵan deıin Aıdyn Rahımbaev Qazaqstandaǵy turǵyn úı naryǵy bir jarym jyldan erte qalpyna kele bastaýy múmkin ekenin aıtqan. Ol qurylys kompanıalary suranystyń tómendeýi jaǵdaıynda jumys istep jatqanyn jáne naryqtyń jyldam ózgerýine alǵysharttardy ázirge kórmeıtinin atap ótti.