AQSH-tyń Sent-Lýıs qalasynda ótip jatqan áıelder arasyndaǵy Cairns Cup-2026 sýpertýrnıriniń birinshi týrynda qazaqstandyq grosmeıster Bıbısara Asaýbaeva qaramen oınap, ýkraınalyq shahmatshy Anna Mýzychýkpen teń aıaqtady. Reıtıń boıynsha favorıt sanalatyn qarsylastar (22 jastaǵy qazaqstandyqta 2538, 36 jastaǵy ýkraınalyqta 2529) 43-shi júriste kelisimge keldi, dep habarlaıdy infohub.kz.
Júlde qory 250 000 dollardy quraıtyn týrnırge jeti grosmeıster men úsh halyqaralyq sheber qatysýda. Bul — áıelder shahmatyndaǵy eń iri júlde qorlarynyń biri.
Birinshi týrda Qytaıdan kelgen 16-shy álem chempıony Tan Chjýnı (2520), Álem kýbogynyń ıegeri úndistandyq Dıvá Deshmýkh (2490) jáne amerıkandyq Elıs Lı (2430) jeńiske jetti.
Ekinshi týrda Asaýbaeva Úndistannyń taǵy bir ókili — Vaıshalı Rameshbabýmen (2489) kezdesedi. Ol aldaǵy shahmat táji úshin machqa qatysady. Startta Rameshbabý aqpen Deshmýkhtan utylǵan bolatyn.
Bul bedeldi sýpertýrnır amerıkandyq shahmattyń Mekkesi sanalatyn Sent-Lýıste (Mıssýrı shtaty) ótýde. Aıta keteıik, jergilikti ýnıversıtet komandasy jaqynda Almatyda ótken FIDE World University Team Chess Championship-2026-da kúmis júldege ıe boldy.
Endi Asaýbaeva Sent-Lýıske qaıta oraldy. Ótken jyly ol munda jetinshi oryn alǵan edi. Buǵan deıin Cairns Cup-qa qazaqstandyq shahmatshy Jansaıa Ábdimálik eki ret qatysqan.
Cairns Cup óz ataýyn Sent-Lýıs shahmat klýbynyń negizin qalaýshylardyń biri, álemdik shahmat Dańq zalyna engen Djınn Kerns Sınkfıldtiń qurmetine alǵan. 80 jastaǵy shahmat mesenaty 2024 jyly «Kerns Kýınz Chess» syılyǵyn taǵaıyndaǵanymen de tanymal. Bul bastama — óz túrindegi alǵashqysy — bes jyl ishinde halyqaralyq grosmeıster ataǵyn alǵan kez kelgen amerıkandyq áıelge 100 000 dollar usynady. 2029 jyldyń shildesine deıin jaramdy baǵdarlama AQSH-ta áıelder shahmatyn tanymal etýge aıtarlyqtaı yqpal etýde.
Alǵashqy Kerns kýbogy 2019 jyly ótken. Sodan beri onyń reglamenti ózgergen joq. Uıymdastyrýshylardan jeke shaqyrý alǵan on shahmatshy bir aınalymda oınaıdy. Ýaqyt baqylaýy klasıkalyq: 40 júriske 90 mınýt, sodan keıin partıa sońyna deıin 30 mınýt, ár júriske birinshiden bastap 30 sekýnd qosylady.
Týrnır jeńimpazy 60 000 dollar, vıse-chempıon 50 000, úshinshi oryn 40 000 alady. Qalǵan qatysýshylar da aqshalaı bonýssyz qalmaıdy: sońǵy orynǵa 7 000 dollar beriledi.
Sent-Lýıste qatar iri erler týrnıri — Sinquefield Cup ótýde, ol da Djınn Kerns Sınkfıldtiń qurmetine atalǵan. Onda basqalarmen qatar Ózbekstannan shahmat tájine úmitker Javohır Sındarov qatysýda. Birinshi týrda Asaýbaevanyń jigiti amerıkandyq Levon Aronánmen teń oınady.