Atyraý – Aqtóbe baǵytymen júrgen poıyzda bıletsiz kele jatqan er adam kóz jumdy. Kináliler jaýapqa tartyldy, dep habarlaıdy infohub.kz saıty.
Oqıǵa 2026 jylǵy 13 shildede Qandyaǵash – Aqtóbe ýchaskesindegi №691/692 jolaýshylar poıyzynda boldy. «Jolaýshylar tasymaly» kompanıasynyń habarlaýynsha (dep jetkizdi «Qazınform» HAA), poıyz bastyǵy bıletsiz jolaýshynyń vagonǵa otyrǵyzylǵanyn, al ony provodnıktiń ótkizgenin málimdegen. Jolaýshy jol ústinde kenetten qaıtys boldy.
Kompanıanyń qosýynsha, vagondaǵy aýa kondısıonerleý júıesi qalypty rejımde jumys istegen, al temperatýralyq rejım belgilengen normatıvterge sáıkes bolǵan.
Máıit Aqtóbe stansıasyna kelgennen keıin qajetti prosesýaldyq is-sharalardy júrgizý úshin ýákiletti organdardyń qyzmetkerlerine tapsyryldy.
İshki qyzmettik tergeý qorytyndysy boıynsha vagonnyń eki provodnıgi men poıyz bastyǵymen eńbek sharttary buzyldy. Sonymen qatar, Aqtóbe ýchaskesiniń bastyǵy men óndiristik oqytý nusqaýshysyna qatań sógis jarıalandy. «Batys» fılıalynyń basshylyq quramyna qatysty da jumystan shyǵarýǵa deıingi qatań tártiptik sharalar qoldaný josparlanýda.
Oqıǵanyń mán-jaıyn Aqtóbe stansıasyndaǵy jelilik polısıa bóliminiń qyzmetkerleri tergep jatyr. Jolaýshynyń eki jaqty ókpe qabynýynan qaıtys bolýy múmkin degen boljam bar.