127 myńnan astam talapker nátıjelerin 7 tamyzda bile alady, dep habarlaıdy infohub.kz saıty.
2026–2027 oqý jylyna arnalǵan memlekettik bilim granttaryn berý konkýrsynyń qorytyndysy 7 tamyzda saǵat 15:00-de jarıalanady. Bul týraly QR Ǵylym jáne joǵary bilim mınıstri Saıasat Nurbek málimdedi.
Mınıstrdiń aıtýynsha, respýblıkalyq komısıa memlekettik bilim granttaryn bólýdi aıaqtaǵan. Komısıa quramyna memlekettik organdardyń, qoǵamdyq uıymdardyń, bilim salasyndaǵy kásipodaqtardyń, «Atameken» Ulttyq kásipkerler palatasynyń jáne JOO qaýymdastyǵynyń ókilderi endi.
«Bıyl konkýrsqa 127 myńnan astam ótinim tústi. Talapkerler arasynda „Pedagogıkalyq ǵylymdar“, „Injenerlik, óńdeý jáne qurylys salalary“ jáne „Aqparattyq-kommýnıkasıalyq tehnologıalar“ baǵyttary eń tanymal boldy», — dedi Saıasat Nurbek.
Mınıstr sondaı-aq bıyl bolashaq aýdarmashylardy, dıplomattardy, zańgerlerdi, psıhologtardy jáne pedagogtardy daıyndaıtyn bilim baǵdarlamalaryna eń joǵary konkýrs kútiletinin atap ótti.
Memlekettik bilim granttarynyń ıegerleriniń tizimi 7 tamyzda saǵat 15:00-de Ǵylym jáne joǵary bilim mınıstrliginiń resmı aqparattyq resýrstarynda, sondaı-aq vedomstvo basshysynyń áleýmettik jelilerdegi paraqshalarynda jarıalanady.
Mınıstrlik joǵary oqý oryndaryna qujat qabyldaý 2026 jyldyń 25 tamyzyna deıin jalǵasatynyn eske saldy.
«Qurmetti talapkerler! Eresek ómirge qadam basqan joldaryńyz jarqyn jetistikterge, jańa múmkindikterge jáne úlken tabystarǵa toly bolsyn. Shyn júrekten eńbekterińizdiń aqtalyp, árqaısyńyz armandaǵan ýnıversıtetińizdiń stýdenti atanasyzdar dep tileımin», — dedi mınıstr bolashaq stýdentterge.