Qazaqstanda bilim berý jobalarynyń konkýrsyna ótinim qabyldaý bastaldy. Úzdik bastamalardyń avtorlary óz sheshimderin damytý men aýqymdaý úshin 10 mln teńgege deıin grant ala alady, dep habarlaıdy infohub.kz.
Ótinimdi 2026 jylǵy 30 shildeden 31 tamyzǵa deıin berýge bolady. Konkýrs qorytyndysy boıynsha bes pen jeti jobaǵa deıin qoldaý kórsetý josparlanýda, olardyń árqaısysy 10 mln teńgege deıin ala alady. Jeńimpazdar 10 qyrkúıekte jarıalanady.
Konkýrs bilim salasyndaǵy qazirdiń ózinde jumys istep turǵan jobalarǵa arnalǵan. Uıymdastyrýshylardyń aıtýynsha, bastamalardyń alǵashqy nátıjeleri, aıaqtalǵan pılottyq kezeńi nemese daıyn ónimi bolýy kerek. Tek ıdeıa deńgeıindegi jobalar konkýrsqa jiberilmeıdi.
«Ózgerister máseleniń ózdiginen sheshilýin kútpeıtin adamdardan bastalady. Biz dál osyndaı komandalardy – jumys istep turǵan sheshimderi, batyl ıdeıalary jáne júıeli jumys isteýge daıyndyǵy bar komandalardy qoldaǵymyz keledi. Eger sizdiń jobańyz mektep oqýshylaryna, stýdentterge nemese oqytýshylarǵa kómektesip jatsa jáne ony qalaı kúsheıtýge bolatynyn túsinseńiz, biz sizdiń ótinimińizdi asyǵa kútemiz», — dedi EA Charity fund dırektory Aıdar Burybaev.
Ótinimdi Qazaqstanda bilim berý bastamalaryn júzege asyratyn 21 jastan asqan jeke jáne zańdy tulǵalar bere alady. Áleýetti qatysýshylardyń qatarynda: bilim berý startaptary, qosymsha, kásiptik baǵdarlaý jáne ınklúzıvti oqytý ortalyqtary, oqytýshylar men stýdentter.
Basymdyq sapaly bilimniń qoljetimdiligin arttyrýǵa, oqý úderisine jańa tehnologıalardy engizýge, pedagogtardy qoldaýǵa, ınklúzıvti bilimdi damytýǵa jáne qaýipsiz bilim berý ortasyn qurýǵa baǵyttalǵan jobalarǵa beriledi.
Ótinimder qazaq jáne orys tilderinde Tamyr Platform saıty arqyly 31 tamyzda saǵat 23:59-ǵa deıin qabyldanady. Qosymsha aqparatty platformanyń saıtynan jáne áleýmettik jelilerinen alýǵa bolady.