Túrkistan oblysynda «jasyl» energetıka salasynda iri joba júzege asyrylmaq. Sairam biogas and fertilizers factory kompanıasy bıogaz zaýytyn salyp, ıntegrasıalanǵan tyńaıtqyshtar óndirisin jolǵa qoıýdy josparlap otyr. Investısıa kólemi shamamen 25 mlrd teńgeni quraıdy, dep habarlaıdy infohub.kz saıty.
Jobany Túrkistan oblysy ákiminiń orynbasary Qanat Qaıypbek pen kompanıanyń bas dırektory Almaz Túlenov talqylady. Kezdesý barysynda taraptar jobany iske asyrý perspektıvalary men bolashaq kásiporyndy ınjenerlik ınfraqurylymmen qamtamasyz etý máselelerin qarastyrdy.
Ákimdiktiń málimetinshe, zaýytty Saıram aýdanynyń Mankent aýyldyq okrýgine ornalastyrý josparlanýda. Kásiporyn aýdany 17,29 ga quraıdy. Investorlar 100 jumys ornyn ashýdy kózdep otyr.
Zaýyt iske qosylǵannan keıin jylyna 4,95 MVt-qa deıin elektr energıasyn óndire alady. Jobany kezeń-kezeńimen – 2027-2029 jyldary iske asyrý josparlanýda. Qazir ol Biryńǵaı ındýstrıalandyrý kartasyna engizilgen.
Qaıypbek aımaq bıligi tıimdi ınvestısıalyq jobalardy qoldaýǵa daıyn ekenin atap ótti. Onyń aıtýynsha, jańa zaýyt ónerkásiptiń damýyna, ekologıalyq taza energıa óndirýge jáne jańa jumys oryndaryn qurýǵa yqpal etýi múmkin.
Adata derekterine sáıkes, Sairam biogas and fertilizers factory kompanıasynyń ıesi – Almaz Túlenov. Ol sondaı-aq 2026 jyldyń aqpanyna deıin Kusto Energy degen atpen jumys istegen «Grınagro» kompanıasyna da ıelik etedi.
2019 jyly Kusto Energy, BAQ habarlamalaryna sáıkes, Kusto Group-tyń energetıkalyq bólimshesi retinde tanylyp, Aqmola oblysynyń Býrabaı kýrorttyq aımaǵynda bıogaz zaýytyn salýdy josparlaǵan. Sonymen qatar, Kusto Group-tyń resmı saıtynda Kusto Energy nemese «Grınagro»-men baılanys týraly aqparat joq. Kusto Group-tyń negizin qalaýshy jáne negizgi ıesi – kásipker Erkin Tatıshev. Ol Forbes nusqasy boıynsha eń baı qazaqstandyqtar tiziminde 435 mln dollar baılyǵymen 24-orynda tur. Onyń seriktesi Qanat Kópbaev 191 mln dollarmen 55-orynda.