Qazaqstanda azamattardyń kezeksiz jáne kóshi-qon qyzmeti mamandarynyń qatysýynsyz pasport pen jeke kýálik rásimdeýine múmkindik beretin pılottyq joba iske qosylady. Bul HQKO-darǵa ornatylatyn bıometrıalyq termınaldardyń arqasynda múmkin bolady, dep habarlaıdy infohub.kz saıty.
QR Sıfrlyq damý, ınovasıalar jáne aeroǵarysh ónerkásibi mınıstrligi men İshki ister mınıstrliginiń birlesken buıryǵy «Ádilet» AJJ saıtynda jarıalandy. Qujat «Bıometrıalyq qujattandyrý termınaly» keshenin paıdalana otyryp, QR azamattaryna pasporttar men jeke kýálikter berý» memlekettik qyzmetin kórsetý tártibin retteıdi.
Termınaldar Astana, Almaty, Shymkent qalalaryndaǵy, oblys ortalyqtaryndaǵy jáne Baıqońyrdaǵy «Azamattarǵa arnalǵan úkimet» front-ofısterinde ornatylady. Olardy 28 tamyzdan bastap paıdalanýǵa bolady.
Mańyzdy shart: termınal arqyly jeke kýálikti tek onyń qoldanylý merzimi aıaqtalǵan jaǵdaıda ǵana alýǵa bolady. Bul rette qyzmet qoldanylý merziminiń aıaqtalýyna 30 kúntizbelik kúnnen aspaıtyn ýaqyt qalǵanda nemese merzim 10 kúnnen aspaıtyn ýaqytqa ótkende ǵana qoljetimdi. Basqa jaǵdaılarda júıe ótinish berýshige HQKO-ǵa júginý qajettigi týraly habarlaıdy.