InfoHub Logo

Bir ǵana danamen shyǵarylǵan avtokólikter – bul túrli avto-shoýlarda kórsetý úshin qurastyrylǵan jobalar ǵana emes. Kóbine baı jáne aýqatty adamdar avtokonsernderge tanymal úlgilerdiń eksklúzıvti nusqalaryna tapsyrys beredi, nemese ózderi ataýly kúnderge oraı shyǵarady.

Maybach Exelero

Sirá, álemdegi eń sándi ári qymbat sýperkarlardyń biri. Maybach 57 lımýzıniniń negizinde 2005 jyly qurastyrylǵan sportkýpe nemis Fulda dońǵalaq óndirýshisimen birigip jasalǵan. Fulda kompanıasy saǵatyna 370 kılometrden joǵary jyldamdyqqa eseptelgen joǵaryjyldamdyqty dońǵalaq tysynyń jańa býynyn kórsetýdi maqsat etken. 2011 jyly avtokólikti Birdman laqap atymen óner kórsetetin amerıkalyq reper Braıan Ýıláms 8 mıllıon dollarǵa satyp aldy. Al bir jyldan keıin Daimler «Maıbah» belgisin jabatyndyǵyn habarlady. Buǵan sebep onyń sońǵy jyldary konsernge tek shyǵyn ákelip jatqandyǵy boldy.

 

Ferrari F12 Berlinetta TRS

Atyn qupıada ustaýdy talap etken klıenttiń tapsyrysy boıynsha jınaqtalǵan. Tapsyrys berýshi Ferrari-ge F12 Berlinetta kýpesiniń ashyq, erekshe nusqasyn jasaýdy talap etken. Resmı emes aqparattar boıynsha, bul erekshe kóliktiń quny $4,2 mıllıonnan asqan.

 

McLaren X-1

Bul úlgi Special Operations bóliminiń ınjenerlerimen Taıaý Shyǵystyq qupıa klıenttiń arnaıy tapsyrysymen jasalǵan. Satyp alýshynyń barlyq qalaýy 7 mıllıon dollardy quraǵan.

 

Porsche 911 Panamericana

Avtokólik Porsche kompanıasynyń dırektory Ferrı Porsheniń týǵan kúnine 1989 jyly syılandy. Onyń dızaınyn birneshe jyldan keıin álemge ańyzǵa aınalǵan Porsche Boxster-di syılaǵan Harm Lagaaı jasaǵan.

 

Ford GT90

Detroıt avtosalonynda 1995 jyly kórsetilgen konsept óndirýshilermen «álemdegi eń qarymdy sýperkar» dep usynyldy. Shynymen de, avtomobıldiń tórt trýbınaly 12-sılındrli agregaty 720 at kúshine teń keletin, al málimdelgen jyldamdyǵy shamamen 407 kılometr saǵatqa jetetin. Aıta keterligi, on jyldan keıin týra osyndaı jyldamdyqqa ıe Bugatti Veyron sýperkary paıda boldy.

Rolls-Royce Hyperion

Bul eksklúzıvti kólikti kolleksıoner Roland Hol tapsyryspen jasatqan. Rolls-Royce Hyperion 2008 jyly kabrıolet keıpinde jasalǵan. Onyń syrt pishini 1930 jyldary Rollers kýzovtyq atele shyǵaratyn úlgilerden kelgen. Dızaınymen aty ańyzǵa aınalǵan Pininfarina atelesi aınalysqan.

 

Cadillac Cien

Kompanıanyń 100 jyldyq mereıtoıyna arnaıy qurastyrylǵan. Mereıgerge tán, Cien sol sáttegi eń ozyq tehnologıalarmen qamtylǵan bolatyn. Ol OnStar komýnıkasıalar seriginiń jıyntyǵyna, Communiport dybyspen basqarý júıesine, turaq kómekshisine jáne mańdaı aınasyna jol sýretin ekranda úlkeıtip kórsetetin túngi baqylaý júıesine ıe edi. Biraq, munyń bári oǵan ómirde esh qajet bolmady – avtokólik kompanıanyń murajaıynda tur.

 

BMW Gran Coupe Pininfarina Lusso

Atyna qarap, bul avtokólikti shyǵarýǵa qandaı kompanıalar atsalysqanyn baıqaýǵa bolady. Kýpeniń tórtoryndy ıntereri, qurastyrýshylardyń aıtýy boıynsha, zamanaýı sánqoılyq pen senimdi dınamıkanyń qosyndysy. Ol qymbat bylǵary men kaýrı aǵashymen qaptalǵan.

 

Peugeot Onyx

Erekshelikti qalaıtyn fransýzdar «tas» ataýymen, ádetten tys materıaldarmen sýperkar qurastyrdy. Karbonnan ózge, Peugeot Onyx qurylysyna jez, kıiz ben qaǵaz paıdalanyldy. Fransýzdar Peugeot Onyx-ti serıalap shyǵarmaımyz dep birden aıtty, alaıda bolashaqta qandaı stılısıkalyq baǵytty ustanatynyn aıqyndap berdi. Sondaı-aq, Peugeot bas dızaıneri Jıl Vıdal konseptiń «aldy» 308 ben 3008 úlgileriniń kelesi býynynyń aldyńǵy bóligine paıdalandy.

 

VAZ Rapan

Kórshiles eldiń avtopromynyń da bir danamen shyǵarylǵan avtokólikter tizimine usynatyn úlgisi bar. VAZ Rapan – Parıj avtosalonynda kórsetilgen reseılik tuńǵysh konseptýaldy elektromobıl. Ol 1998 jyly shyǵarylǵan jáne, ókinishke oraı, azserıaly jalǵasyn da tappady. Jobaǵa janarmaı beketterin arnaıy elektrlik janarmaımen qamtamasyz etý úshin «Reseıdiń EEO» RJSH-in tartpaq bolǵan degen málimet bar, biraq olar qyzyqpaǵan kórinedi.

 

ZIS-Sport

Rodster ZIS-Sport ZIS-101 shasıiniń negizinde 1939 jyly bir ǵana danamen qurastyrǵan. Qýaty 141 at kúshine teń alty lıtrli qozǵaltqysh saǵatyna 162 kılometrge qarqyndaýǵa múmkindik bergen. Avtokólik Stalın men Kaganovıchtiń maquldaýyn aldy, alaıda soǵystan keıin bir danamen ǵana shyǵarylǵan ZIS-Sport úshti-kúıli joǵalyp ketti.

 

Dartz PROMBRON AS1936 Monaco Red Diamond Edition

Avtokólik bir ǵana danamen Hammer-diń negizinde Latvıada tapsyryspen jasaldy, eksklúzıvti qaptamaǵa ıe. Bul bronevık (qarý ornatylǵan quryshty avtomobıl) 1.6 mln. dollarǵa satyp alyndy jáne bul jol talǵamaıtyn kólikke tólengen eń joǵary baǵa. Avtokólik 312 km/saǵ-qa deıin qarqyndaıdy, al 100 km-di 5.2 sek-ta jınaıdy. 552 at kúshine teń alty lıtrli qozǵaltqyshqa ıe.

 

Mercedes-Benz GWA 300 SLC

Shyǵys Eýropalyq belgisiz bir aýqatty adam ózin esklúzıvti avtokólikpen qýantqysy kelgen. Óz armanyn iske asyrýdy ol Mercedes konsernine tapsyrady. Onyń ıdeıasy - ańyzǵa aınalǵan 1955 jylǵy Mercedes-Benz 300 SC-ten SLS AMG negizinde zamanaýı rodster qurastyrý edi. Nátıjesinde, baǵasy qupıa saqtalyp kelgen erekshe avtokólik Gullwing Americ shyqty. Mercedes-Benz GWA 300 SLC 571 at kúshine teń keletin V8-ben qamtylǵan, eń joǵary jyldamdyǵy 315 km/saǵ, júz kılometrge deıin qarqyndy 3,8 sekýndta jınaıdy. Rodsterdiń dızaıny qanshalyqty ózgergenin ózderińiz baǵalap kórińizder.

 

Sbarro GT1

Sbarro GT1 óz teginde jalǵyz dana. Ol Mercedes komandasynyń 1999 jylǵy Le Mann jarys serıasyndaǵy jeńisiniń qurmetine qurastyrylǵan. Avtokólik 450 at kúshine jetetin 7,4-lıtrlik V8 qozǵaltqyshymen qamtylǵan. Qazir, árıne, bul asa kóp emes sıaqty kórinedi, biraq sol jyldary mundaı óndirimdilik asa zor kórinetin. Qozǵaltqysh artynda ári kúsheıtilgen kompozıttik qoraptyń dál ortasynda ornalasqan.

 

Lamborghini Egoista

2013 jyly Lamborghini kompanıasy óziniń 50 jyldyq mereıtoıynda tańǵalarlyq Lamborghini Egoista sýperkaryn tanystyrdy. «Mereıtoılyq» jańalyqtyń basty ereksheligi, salon, naqty aıtqanda «pılot kabınasy» (konsept-kardyń esikteriniń ornyna qaıyrmaly shatyr nemese áskerı tilde «fonar») bir adamǵa ǵana eseptelgen. Syrt kelbeti, Egoista-nyń ıntereri sıaqty áskerı avıasıamen ushtasady. Avtokólikti 5,2 lıtrlik motor V10 qozǵalysqa ákeledi. Sportkar qurylysynda kómirqyshqyl talshyq paıdalanylady, sonyń esesinde avtokóliktiń salmaǵy bar-joǵy shamamen bir tonnany quraıdy. 

---