Qazaqstan Respýblıkasynyń Qarjy naryǵyn retteý jáne damytý agenttigi óz qyzmeti týraly taraǵan jalǵan aqparatty joqqa shyǵaryp, Biryńǵaı bankaralyq QR-kodty retteý onyń quzyretine kirmeıtinin túsindirdi. Vedomstvo sonymen qatar qadaǵalaý jumysynyń nátıjeleri, onyń ishinde mıkroqarjy uıymdary men kolektorlyq agenttikterdiń lısenzıalarynyń qaıtarylǵany, halyqtyń qaryz júktemesiniń tómendegeni jáne qarjylyq alaıaqtyqqa qarsy kúres týraly esep berdi, dep habarlaıdy infohub.kz saıty.
Agenttik «Qazaqstan Respýblıkasynyń Ulttyq Banki týraly» zańǵa sáıkes QR-kodtyń jumys isteýi jáne tólem júıelerin retteý máseleleri Ulttyq Banktiń quzyretinde ekenin atap ótti. «Agenttik bankaralyq ekvaırıń boıynsha komısıalardy belgilemeıdi jáne tólem júıeleriniń tarıftik saıasatyn rettemeıdi», — delingen vedomstvo málimdemesinde.
Sonymen qatar, agenttik qadaǵalaý qyzmetiniń nátıjelerin eske saldy. Mıkroqarjy uıymdaryna turaqty baqylaý júrgiziledi: 2021 jyldan bastap buzýshylyqtar úshin 127 mıkroqarjy uıymy men 135 kolektorlyq agenttiktiń lısenzıasy qaıtaryldy. Tek 2024–2026 jyldary 55 mıkroqarjy uıymy men 29 kolektorlyq agenttik lısenzıasynan aıyryldy. Zańnamany buzǵany úshin 500 mıllıon teńgeden astam somaǵa 1,6 myńǵa jýyq ákimshilik aıyppul salyndy.
Vedomstvo halyqtyń qaryz júktemesin tómendetý sharalary týraly da habarlady. 2025 jyly 33,9 myń qaryz alýshynyń negizgi boryshy, syıaqysy, aıyppuldary men ósimpuldary tolyq nemese ishinara esepten shyǵaryldy, al 722 myń qaryz alýshy qaryzdy qaıta qurylymdaýdan ótti.
Agenttik 2024 jyly Ulttyq Bankpen birlesip qabyldanǵan ózgeristerdi bólek eske saldy. Sonda syıaqynyń jyldyq tıimdi mólsherlemesiniń shekti mólsheri tómendetildi: kepilsiz banktik nesıeler men mıkrokredıtter boıynsha eń joǵary mólsherleme 56%-dan 46%-ǵa, kepildi nesıeler boıynsha 56%-dan 40%-ǵa deıin azaıtyldy. 45 AEK-ke deıingi, merzimi 45 kúnnen aspaıtyn onlaın-mıkrokredıtter úshin eń joǵary kúndik mólsherleme 1%-dan 0,3%-ǵa deıin tómendetildi.
Qarjylyq alaıaqtyqpen kúreske úlken kóńil bólinýde. Alaıaqtyq sqemalarǵa qarsy is-qımyl quqyq qorǵaý organdarymen, Ulttyq Bankpen jáne naryq qatysýshylarymen birlesip júrgiziledi. Kúdikti operasıalardy jedel anyqtaý jáne jolyn kesý úshin naqty ýaqyt rejıminde aqparat almasýdy qamtamasyz etetin Ulttyq Banktiń Antıfrod-ortalyǵy jumys isteıdi. 2025 jyldyń basynan beri onyń jumysynyń arqasynda 68 mıllıard teńgeden astam somaǵa 163 myńnan astam alaıaqtyq operasıanyń aldyn alyndy, taǵy 28,9 mıllıard teńgege operasıalar buǵattaldy.
Zańnamalyq deńgeıde nesıelerdi alaıaqtyq jolmen rásimdeýdiń aldyn alý sharalary iske asyryldy: qaryz alýshylardy mindetti bıometrıalyq sáıkestendirý, onlaın-nesıelerdi rásimdeý kezinde salqyndatý kezeńi, birinshi nesıeni alý kezinde jeke qatysý talaby, tergeý kezinde alaıaqtyq nesıeler boıynsha syıaqyny esepteýge tyıym salý, mundaı nesıelerdi sottan tys jáne sot tártibimen esepten shyǵarý negizderin keńeıtý. 2025 jyly bankter men mıkroqarjy uıymdary 1,9 mıllıard teńge somasyna azamattardyń 1,6 myń alaıaqtyq nesıesin esepten shyǵardy.
Agenttik qabyldanyp jatqan sharalar týraly aqparat agenttik pen Ulttyq Banktiń jyldyq esepterinde, sondaı-aq vedomstvolardyń resmı ınternet-resýrstaryndaǵy aı saıynǵy sholýlarda turaqty jarıalanatynyn atap ótti.